En in giug da paucas schanzas mo dabia colur piarda Schluein Glion encunter Valposchiavo Calcio igl emprem giug dil campiunadi 2018/2019. Ils Puschlavins han dau oravontut en la defensiva in giug senza cumpromiss e nezegiau in conter per marcar igl 1:0, quei en ina fasa dil giug nua che ils Sursilvans eran cun in um pli pauc sil plaz muort ina blessura dil capitani Luca Vinzens.
Il giug denter ils Sursilvans ed ils Puschlavins entscheiva cun in siet ord il nuot dils indigens che tucca la traversa dil gol da David Hornacek. Suenter quei avertiment han ils hosps sedau bregia da controllar il giug en la defenisva e da vegnir tier schanzas da lur vart. Aschia vegn Lars Caduff en la 22avla minuta tier ina buna occasiun per marcar igl 1:0, quei suenter ina buna stafetta da balla sur pliras staziuns. Il goli dils indigens, Marco Foppoli, parescha denton cun bravura. Encunter la fin dalla emprema mesadad vegn il giug empau pli hectics e dirs. En in dils numerus cumbats en quella fasa dil giug croda Luca Vinzens suenter in foul dils Puschlavins en la 42avla minuta disfortunadamein sin sia schuiala e sto vegnir tgiraus sper il plaz. Cun il capitani dils hosps sper lingia han ils Puschlavins giu dapli spazi el center dil plaz, il qual els han promt nezegiau en la 43avla minuta per marcar igl 1:0 entras Phatphuang, quei suenter in conter.
Malgrad il 1:0 e suenter haver stuiu remplazzar il capitani ha Schluein Glion entschiet en il giug suenter pausa cun bia slontsch. En la 50avla minuta ei quei slontsch denton vegnius frenaus anetgamein entras il arbiter cun mussar la secunda carta mellna a Tiziano Vinzens, quei suenter in foul tactic amiez il plaz. Tgi che vess spitgau che ils Puschlavins surprendan ussa la controlla dil giug ha denton sbagliau. Schluein Glion muossa numnadamein gronda morala e vegn aschia en la 57avla minuta tier ina buna schanza entras Marino Cavegn. Il goli dils Puschlavins era gia battius mo il defensur vegn cuort avon la lingia dil gol aunc da spindrar sia equipa dalla egalisaziun. En la 66avla ei lu igl arbiter la proxima gada staus la figura centrala dil giug. El ha numnadamein per surpresa da giugadurs ed aspectaturs mussau la carta cotschna a Daniel Caldeira per in foul sco els schabegian per regla en tozzels en giugs da 3. ligia. Cun dus giugadurs dapli sil plaz per las davosas 25 minutas han ils Puschlavins concentrau lur forzas sin la defensiva, quei che ei gartegiau malgrad ina ni l’autra buna acziun dils hosps. Aschia ei il giug ius a fin cun la victoria da 1:0 per ils Puschlavins e cun l’emprema terrada dalla sesiun 2018/2018 per Schluein Glion.
Valposchiavo Calcio – US Schluein Glion 1:0 (1:0)
Casai, Campascio. – 120 aspectaturs. – AR: Trzewik
Gols: 43. Phatphuang 1:0.
Valposchiavo: Foppoli; Solèr, Luca, Fiorina, Cortesi; Lari, Merlo, Rampa, Magro; Raselli, Phatphuang.
Schluein Glion: Hornacek; Dermont (60. Sergio Welter), Berni, Livio Derungs, Silvan Welter; Bundi, Luca Vinzens (42. Tschalèr), Marino Cavegn, Tiziano Vinzens; Caldeira, Caduff (70. Fabrizio Cavegn).
Remarcas: Cartas mellnas: 35. Caduff (reclamar), 40. Tiziano Vinzens (foul), 55. Raselli (foul), 57. Welter (reclamar), 75. Rampa (foul), 81. Bundi (foul). Cartas mellen/tgietschen: 49. Tiziano Vinzens. Cartas cotschnas: 66. Caldeira (foul) – Schluein Glion senza Giacomelli (cuors da trenader), Luca Vinzens croda ora blessaus (42. min).