Buna secunda mesadad ha menau al success

Suenter in’emprema mesadad uliva, han quater gols ellas davosas bien 25 minutas purtau treis ulteriurs puncts a nossa secunda el giug encunter Cuera 3.

Omisduas equipas han giu entginas bunas acziuns encunter anavon ell’emprema mesadad. Cuort avon il gol han las ideas denton savens muncau, ni che la balla ei vegnida spedida lunsch sper il gol ora dils attaccaders. La defensiun dall’equipa da casa ha per part giug breigia da schazegiar en ballas aultas pervia dil ferm vent che buffava en direcziun da lur gol. Tuttina han els stuiu schar tier negin gol dils hosps da Cuera. Per la tschunavla gada egl otgavel giug da quei atun ha la defensiun entuorn capitani Ricky e sia crew teniu la nulla davostier, ina prestaziun admirabla.

Ella secunda mesadad ha Cuera 3 schau suenter fetg, aschia che nossa secunda ei vegnida tier dapli occasiuns da marcar gols. Suenter 50 minutas ha Fabrizio tuccau la petga cun in bi siet bass. Dapli success ha Dario Derunngs giu rodund in quart d’ura pli tard. El ei vegnius lantschaus cun in schuber pass ella profunditad ed ha schau negina schanza al goli da Cuera d’evitar igl 1:0 per l’equipa da casa. Il pli bi gol da quei suentermiezgi sulegliv ei curdaus ella 71avla minuta. Marc Camenisch ha riscau d’ir anavon entochen ella da sedisch digl adversari ed ei vegnius da serrar giu cun success ina combinaziun sur pliras staziuns, che haveva entschiet tier el ell’atgna mesadad dil plaz. Suenter il 2:0 ha l’equipa da Cuera dau si dil tuttafatg ed aunc schau tier dus ulteriurs gols che han menau al bi resultat final da 4:0 ord vesta dall’equipa da casa.

El davos giug da quei atun frunta l’USSI2 sill’equipa da Trun/Rabius, dumengia ils 21-10-2018 allas 15:00 a Trun.

US Schluein Ilanz 2 – Cuera 97 3 4:0 (0:0)
Crap Gries, Schluein

Gols: 64. Dario Derungs 1:0, 71. Marc Camenisch 2:0, 76. Ronny Della Morte 3:0, 90. + 3 Hares Sadat

US Schluein Ilanz 2: Flurin Capaul; Ronny Panier (46. Sven Brasser), Patrick Camenisch, Marc Camenisch, Robin Studer; Ronny Della Morte (78. Hares Sadat), Gian Sgier (27. Mauro Arpagaus), Arno Panier, Noah Weber (59. Livio Casutt); Fabrizio Bonolini, Dario Derungs (82. Roni “tigher” Caminada)
Remarcas: admoniziuns USSI 2: 28. Mauro Arpagaus (foul)

Rapport: Marco Cavegn