Cun ina suverana e madira prestaziun batta Schluein Glion lâequipa da Bogn Ragaz e surpren igl emprem rang en la tabella. Ils indigens han cunzun dau en la defensiun precaut e segir bal ed aschia strusch lubiu agl adversari da vegnir malsegirs avon il gol. Ils Sursilvans han persuenter tuccau treis gadas la noda, treis gadas cun bialas attaccas sur pliras staziuns.
Il giug denter igl emprem ed il secund dalla tabella ha carmalau in bi diember dâaspectaturas ed aspectaturs a Crap Gries che ha spitgau cun tensiun da veser tgei equipa che seigi propi la ferma en la gruppa 1 dalla tiarza ligia. Suenter ina animada entschatta da Bogn Ragaz ha Schluein Glion beinspert surpriu il dictat dil giug cun controllar balla ed adversari. Suenter che il giugadur-trenader Alessandro Giacomelli ha munchentau duas bunas caschuns da marcar â lâemprema cul tgau la secunda cul pei e mintgamai sin pass ni flanca dils defensurs dalla vart â ha la gronda part dils presents spitgau vess sin igl emprem gol dils indigens. Quel ei lu era aunc curdaus cuort avon pausa. Serafin Bundi ha lantschau Lars Caduff en la profunditad ed igl attaccader ha cun saung freid sittau cul pei seniester la balla sper il davos um da Bogn Ragaz vi en la reit.
Cuort suenter pausa ha Tiziano Vinzens surpriu amiez il plaz la balla e instradau in solo en direcziun gol digl adversari. Arrivaus en la zona da puniziun ha el buca sittau sez, mobein stuschau la balla a Lars Caduff che spitgava agl ur dalla lingia dâordgiug. Cura châel ha retschiert il pass ed igl arbiter ha buca schulau, ha el buca studegiau gitg e sittau la balla ferm e segir en la reit. Quella gada cul pei dretg. Suenter quei gol ha il trenader da Bogn Ragaz reagau cun midar en dus giugadurs offensivs ed aschia rinforzar lur giug anavon. Quei ei lu era gartegiau, els han per in mument surpriu il domini dil giug, aschia châil goli da Schluein Glion, David Hornacek, ha suenter varga ina ura finalmein era saviu mussar sias qualitads. Duas gadas ha el bloccau siets naven digl ur dalla zona da puniziun cun grondiusas paradas. Quei ei denton era stau las duas sulettas gadas che lâequipa da Bogn Ragaz ei propi vegnida malsegira. Tut il rest ha Schluein Glion giu sut controlla e cun ina sperta attacca cuort avon la fin ei schizun aunc il tierz gol curdaus per ils indigens. Nathan Gartmann ha tarmess Marino Cavegn en la gassa e lez ha dau la balla travers a Linus Tschalèr che ha stuschau tala da gol en.
US Schluein Glion â FC Bogn Ragaz 3:0 (1:0)
Crap Gries. â 255 aspectaturs. â AR: Weber
Gols: 40. Caduff 1:0, 52.Caduff 2:0, 90.+1. Tschalèr 3:0.
Schluein Glion: Hornacek; Dermont, Berni, Livio Derungs, Sergio Welter; Bundi (88. Gartmann), Luca Vinzens, Marino Cavegn, Tiziano Vinzens (90. Matthias Derungs); Giacomelli (81. Andreoli), Caduff (76. Tschalèr).
Bogn Ragaz: Rodrigues; Kohler, Bergamin (75. Kunfermann), Schneider, Kressig; Michael Caluori (57. Andrea MĂźhlebach), Marco MĂźhlebach, Horni, Bigger; Rauti (57. Antunovic), Orlando Caluori.
Remarcas: Cartas mellnas: 18. Rauti (foul), 81. Giacomelli (reclamar). â Corners: 3:3.