En la 77avla minuta ha Lars Caduff sittau il gol agl 1:2 e procurau per ina finziun dil giug da cup plein tensiun. En las davosas diesch minutas ha Schluein Glion numnadamein giu entras Fabrizio e Marino Cavegn e Raffaele Airaghi treis bunas caschuns da cuntonscher il pari e procurar per ina prolungaziun dil giug.
Las empremas vegn minutas dil giug encunter l’equipa da secunda ligia d’Altstätten sesplegian senza grondas caschuns da marcar sin omisduas varts. Altstätten ha giu dapli la balla, Schluein Glion ha empruau da vegnir malsegirs cun spertas cunterattaccas. Ina da quellas terminescha il giuven Fabrizio Cavegn cun in bi siet en direcziun dil cantun ault dretg. Il bien goli dils hosps deviescha denton quei siet cun ina grondiusa parada en corner. Aunc pli datier da sittar igl emprem gol ei Patric Andreoli staus en la 38avla minuta. Siu siet suenter ina bellezia cumbinaziun sur pliras staziuns ei denton buca setschentaus en la reit, mobein vegnius rebattius dalla traversa. Donn, quella gada havess era il goli giu neginas schanzas d’impedir in gol dils indigens. Enstagl ei igl emprem gol lu curdaus per ils hosps. Suenter in siet da cantun ei la balla vegnida sittada da cuorta distanza el maun ad in giugadur da Schluein Glion ed igl arbiter ha schulau in penalti, il qual Sahin Irisme ha nezegiau cun agid dalla petga per sittar il 0:1.
Cuort suenter pausa ha Simon Lichtenstern marcau cun in ferm siet da distanza che ha medemamein strihau la petga il secund gol per ils hosps. L’equipa giuvna da Schluein Glion ha denton buca resignau ed empruau vinavon tut per vegnir al success. Pliras schanzas ein denton buca vegnidas nezegiadas avon che Lars Caduff ha profitau d’in sbagl dad in defensur dils hosps, che ha dau la balla ad el enstagl a siu goli, e marcau cun saung freid igl 1:2. E suenter quei success havess Schluein Glion giu – sco menziunau all’entschatta da quest rapport – pliras caschuns d’egalisar e prolunghir il giug. Tut quellas ein denton vegnidas munchentadas, aschia che il giug ei ius a fin cun ina victoria per ils hosps e che la historia da cup ei per uonn terminada per Schluein Glion.
US Schluein Glion – FC Altstätten 1:2 (0:1)
Crap Gries. – 100 aspectaturs. – AR: Milos
Gols: 40. Irisme 0:1 (p.), 53. Simon Lichtenstern 0:2, 77. Caduff 1:2.
Schluein Glion: Hornacek; Casanova (46. Silvan Welter), Gartmann, Matthias Derungs, Sergio Welter (62. Caduff); Wellinger, Caldeira, Airaghi, Coray (46. Marino Cavegn); Andreoli, Fabrizio Cavegn.
Altstätten: Dietsche; Ilic, Eugster, Ritter, Simon Lichtenstern (87. Liiro); Bösch (70. Manser), Daniel Lichtenstern, Luggen, Steiger; Gächter, Irisme (59. Göldi).
Remarcas: Cartas mellnas: 28. Irisme (foul), 90. Luggen (foul), 90. Ritter (reclamar) – 38. siet en la traversa Schluein Glion (Andreoli) . – Corners: 1:8.