Mo 0:1 seclamava il resultad da pausa el giug denter Walenstadt e Schluein Glion; diesch minutas pli tard era il giug denton gia decidius. Cun treis gols en mo sis minutas han ils hosps mussau lur potenzial offensiv e priu als indigens tut la speronza da forsa procurar per ina surpresa.
Schegie che Schluein Glion ha dominau il giug naven digl emprem schul digl arbiter ha ei cuzzau varga ina mesa ura avon che igl emprem gol ei curdaus sin la plazza sportiva Exi a Walenstadt. E per sittar quei gol ha ei schizun duvrau ina balla da standard! Marino Cavegn ha deviau in siet da cantun cul tgau en la reit e procurau per igl meritau avantatg. Avon quei gol haveva Schluein Glion fatg bia pressiun surtut sur la vart dretga e procurau per enqual situaziun delicata en la zona da puniziun dils indigens. En la 22avla minuta ha l’equipa da Alessandro Giacomelli denton era giu cletg da buca incassar sezza in gol. En ina dallas raras attaccas dils patruns casa ha numnadamein Salen Skenderi tuccau cun in ferm siet mo la traversa.
Suenter il té ha Schluein Glion lu augmentau aunc ina gada il tempo, aschia che la defenisun da Walenstadt ei stada surdumandada da minuta tier minuta pli e pli fetg. E tuttenina ein ils gols curdai sco fretgs madirs. Marino Cavegn cun siu secund gol persunal, Tiziano Vinzens che ha sittau ina balla rebattida dalla traversa da gol en ed Alessandro Giacomelli han procurau per la decisiun. Suenter quels treis gols ei il giug puspei sequietaus empau ed als indigens eis ei schizun gartegiau da sittar il gol da honur cun in culp liber. Pils treis davos gols ein lu ils giugadurs che ein vegni midai en stai responsabels. Igl emprem ha Patric Andreoli stuschau ord cuorta distanza in pass travers da Linus Tschalèr da gol en e silsuenter ha Lars Caduff mussau ch’el ei in goalgetter cun tuccar duas gadas la noda einteifer cuort temps, omisduas gadas sin pass da Patric Andreoli.
Suenter quella victoria duess l’equipa da Schluein Glion esser semtgada per il giug da proxima sonda. Lu ei numnadamein il capogruppa Bogn Ragaz sin viseta a Crap Gries, l’equipa ha recaltgau entochen ussa tuttina bia puncts sco Schluein Glion.
Gia margis proxim dat l’equipa sursilvana in giug da cup svizzer a Crap Gries. Adversari ei lu l’equipa d’Altstätten che dat ball en secunda ligia. Il giug entscheiva la sera allas 20:00 uras.
FC Walenstadt – US Schluein Glion 1:7 (0:1)
Exi. – 105 aspectaturs. – AR: van Tonder
Gols: 36. Marino Cavegn 0:1, 47. Marino Cavegn 0:2, 49. Tiziano Vinzens 0:3, 54. Giacomelli 0:4, 64. D’Agostino 1:4, 76. Andreoli 1:5, 81. Caduff 1:6, 85. Caduff 1:7.
Walenstadt: Ademi; Sestito (84. Murati), Gmür, Aliu, Daniel Jud; Haliti (67. Svambera), Skenderi, Benjamin Jud, D’Agostino; Velija, Muranovic (54. Pfiffner).
Schluein Glion: Hornacek; Dermont, Berni, Livio Derungs, Silvan Welter; Bundi (60. Andreoli), Luca Vinzens, Marino Cavegn, Tiziano Vinzens; Giacomelli (76. Caduff), Caldeira (70. Tschalèr).
Remarcas: Cartas mellnas: 3. Haliti (foul), 31. Caldeira (foul), 73. Svambera (foul). – 22. siet en la traversa Walenstadt (Skenderi), 49. siet en la traversa Schluein Glion (Caldeira). – Corners: 5:5.
Rapport: Beat Dermont