Malgrad che Schluein Glion ha dominau l’entira emprema mesadad, egalisescha Tusaun/Cazas cun ina sperta cunterattacca suenter in corner per ils indigens cuort avon pausa e metta aschia il giug empau sil tgau. En la secunda mesadad gartegia ei a negina equipa da sittar in gol, aschia ch’ei resta tier il remis denter il capogruppa ed il davos dalla tabella.
L’equipa sursilvana ha priu il giug naven dall’entschatta enta maun e marcau suenter 14 minutas il 1:0 entras Linus Tschalèr che ha stuschau la balla sper il goli vi en la reit. Era suenter quei emprem gol han ils indigens dominau e controllau il giug e sulettamein munchentau d’alzar il resultad e decider il giug. Cuort avon pausa ha Schluein Glion saviu sittar in ulteriur corner e quel ha purtau fretg. Denton buc per Schluein Glion, mobein per ils hosps. Cun ina sperta cunterattacca ei Martin Neuhaus vegnius lantschaus perfect cun in pass en la profunditad ed il giugadur dalla Tumliasca ha marcau cun saung freid il 1:1.
Suenter il té ei il giug staus empau pli ulivs. Las meglieras occasiuns da sittar gols han denton aunc adina ils indigens giu. Tuttas quellas ein denton vegnidas munchentadas, aschia che il giug ei ius a fin cun in buna occasiun per Tusaun/Cazas da sittar il gol dalla victoria. El davos mument avon che Marco Sax setti cul tgau da gol en la balla ha il defensur Stephan Berni percletg deviau ella en corner.
Aschia dat Schluein Glion per l’emprema gada giu puncts en quella sesiun, quei ecunter ina equipa da Tusaun/Cazas che ha cumbattiu cun cumplein engaschi, enqual gadas schizun cun ina direzia ualti hanada.
US Schluein Glion – CB Tusaun/Cazas 1:1 (1:1)
Crap Gries. – 226 aspectaturs. – AR: Schwendener
Gols: 14. Tschalèr 1:0, 44. Neuhaus 1:1.
Schluein Glion: Hornacek; Dermont, Berni, Livio Derungs, Silvan Welter; Bundi (68. Andreoli), Luca Vinzens (89. Fabrizio Cavegn), Marino Cavegn, Tiziano Vinzens; Caldeira, Tschalèr (60. Caduff).
Tusaun/Cazas: Patrick Kienast; Spörri, Brot, Jenny, Rüedi (81. Brenn); Bundi, Bass (46. Spiller), Neuhaus, Komposch (69. Caminada); Sax (87. Brenn), Schweigl (76. Thomas Kienast).
Remarcas: Cartas mellnas: 20. Spörri (foul), 84. Sax (foul). 90 Bundi (foul), 90.+1. Thomas Kienast e Caldeira (omisdus malsportivadad). – 32. siet en la traversa da Luca Vinzens; 75. siet en la traversa da Caldeira. – 68. Bundi croda ora muort blessura. – Corners: 7:4.