Priu a casa ils treis puncts – tut tschei ei meins impurtont, aschia savess ins resumar cuort la bilantscha dil giug Domat 2 – USSI 2 ord vesta dils hosps.
Cun sulegl barschont sils cavels e tgaus bluts dils giugadurs ed aspectaturs ha il giug entschiet a Domat. Las temperaturas aultas per quei temps digl onn paran era d’haver influenzau ils giugadurs. Ell’emprema mesadad ha buc bia vuliu gartegiar, ad omisduas equipas buc. Aschia ein combinaziuns sur pliras staziuns stadas plitost ina raritad. Malsegir avon ils gols eis ei pil pli vegniu suenter situaziuns da standard. L’equipa da Domat ha munchentau il gol mo per pauc suenter in corner, damai ch’ils defensurs dall’USSI ein vegni da spedir naven la balla cuort avon che quella ha surpassau la lingia. La pli gronda schanza da marcar pils hosps ha Mauro Arpagaus giu entginas minutas avon pausa. Per pauc ha el munchentau da deviar la balla en direcziun gol suenter ina flanca.
Ella secunda mesadad ei pauc semidau. Il trelli entuorn il giug d’american football che ha giu liug sil plaz dasperas ha per part bunamein caschunau dapli discussiuns denter ils aspectaturs ch’il giug da balla sez. Pér cuort avon la fin, cu era ils defensurs dall’USSI han entschiet a riscar dapli encunter anavon, ei il giug vegnius pli interessants. Sper las bunas caschuns da marcar sez in gol, ein aschia ils attacaders da Domat vegni da lantschar cunterattaccas empermettentas. Sil gol decisiv han ins stuiu spitgar entochen ella 91avla minuta. Inaga dapli haveva Marc Camenisch anflau la via anavon ella da sedisch digl adversari tier ina situaziun da standard. Suenter che la balla ei siglida avon ils peis ad el, ha el saviu spedir la balla sper il goli da Domat vi agl 1:0 per sia equipa. La davosa caschun d’aunc egualisar il resultat ha Domat giu ella pli davosa minuta cun in culp liber. Alessandro Casutt che ha mussau in bien debut tiels activs ha denton saviu rebatter culs pugns la balla ord la zona malsegira. Aschia sa l’USSI 2 prender a casa ils treis puncts e metter il focus sil proxim giug cun in bien sentiment. El proxim giug frunta l’USSI2 sill’US Danis–Tavanasa sonda, ils 29-09-2018 allas 18:00 a Schluein.
FC Ems 2 – US Schluein Ilanz 2 0:1 (0:0)
Vial, Domat
Gols: 90.+ 1 Marc Camenisch 0:1
US Schluein Ilanz 2: Alessandro Casutt; Dario Casutt, Patrick Camenisch, Marc Camenisch, Robin Studer; Ronny Della Morte (85. Ronny Panier), Gian Sgier, Ivan Derungs (46. Fabrizio Bonolini, 90. + 3 Silvan Frehner), Livio Casutt (46. Sven Brasser); Mauro Arpagaus (46. Dario Derungs), Arno Panier
Remarcas: admoniziuns USSI 2: 89. Ronny Panier (foul); emprem giug en quarta ligia d’Alessandro Casutt