Basta, treis ulteriurs puncts

En in giug cun bia pass falli e piltost paucas acziuns da menziunar ha Schluein Glion recaltgau treis ulteriurs puncts. E quei ei lu era il sulet che quenta, aschia resta l’equipa sursilvana numnadamein alla testa dalla tabella.

L’entschatta ei stada fetg ulivada cun duas equipas che han dau gronda breigia da segirar la defensiun. La secunda equipa da Cuera 97 ha fatg ferma pressiun offensiva e mirau da buca schar vegnir l’equipa da Schluein Glion el giug. Quei ei gartegiau stupent, aschia che ils hosps han stuiu empruar da vegnir cun ballas liungas sils attaccaders al success. Quei ei perencunter buca gartegiau aschi bein. Cuort avon pausa ha igl arbiter lu schulau suenter in foul vid il giugadurtrenader, Alessandro Giacomelli, in penalti. Quel ha menau atras Luca Vinzens al 0:1, quei che ha buca plaschiu al caschunader dil penalti, Hanad Beso. El ha reclamau suenter gia haver survegniu ina carta mellna per il foul ed ei aschia vegnius tarmess digl arbiter cun la carta cotschna giu dil plaz.

Cun in um pli pauc ha Cuera 97 2 sligiau si suenter pausa la cadeina da quater e dau vinavon cun dus attaccaders. Ils indigens han cun quella varianta offensiva fatg surstar ils hosps ed ein aschia vegni d’egalisar il giug en la 50avla minuta. Mitko Gjorgjiesvki ha suenter ina biala acziun sur la vart seniastra sittau ina balla rebattida en la reit. Suenter quell’egalisaziun ha Schluein Glion priu il giug enta maun e fatg dapli pressiun. Quei ha purtau fretg; cuort pli tard ha Linus Tschalèr, mo treis minutas suenter ch’el era vegnius midaus en, sittau il 1:2. Tier quei resultad eis ei stau entochen alla fin era sche Schluein Glion ha aunc giu entras Giacomelli ina fetg gronda caschun da far in tierz gol.

Cuera 97 2 – US Schluein Glion 1:2 (0:1)

Ringstrasse. – 120 aspectaturs. – AR: Aliji

Gols: 45. Luca Vinzens 0:1 (p), 50. Gjorgjievski 1:1; 59. Tschalèr 1:2.

Cuera 97 2: Hartmann; Hunger, Catricala, Hanad Beso, Nsingui; Sewer, Zimmermann, Yogarajah, Thavapararajah; Tino, Gjorgjievski. Reservas: Hosang, Maffezzini, Hanan Beso, Pinheiro Rodriguez, Bersorger.

Schluein Glion: Hornacek; Dermont, Berni, Livio Derungs, Silvan Welter; Bundi (90.+2. Fabrizio Cavegn), Luca Vinzens, Marino Cavegn, Sergio Welter (62. Airaghi); Giacomelli (85. Matthias Derungs), Fabrizio Cavegn (55. Tschalèr).

Remarcas: Schluein Glion senza Andreoli, Caldeira, Casanova (blessai), Tiziano Vinzens e Wellinger (absents). – Cartas mellnas: 45. Hanad Beso (foul), 45.+ 1. Hartmann (reclamar), 64. Bundi (foul), 89. Luca Vinzens (foul). – Cartas cotschnas: 45. Hanad Beso (reclamar, 2. carta mellna).