Recaltgau treis puncts en in giug plitost magher

El tierz giug da casa en seria ha la secunda puspei anflau la via da sittar gols e gudignau cun 2:0 encunter il CB Surses. La bilantscha entochen uss ei equilibrada: quater giugs – duas victorias – duas terradas.

Ils paucs aspectaturs che han anflau la via a Schluein quella sonda sera han viu in giug senza biars “highlights”. Per gronda part han omisduas equipas giu breigia da baghegiar si in giug cultivau. Las situaziuns empau pli interessantas avon ils gols ein vegnidas possiblitadas oravontut entras sbagls ella defensiun ni el giug da miez. Grazia ad in penalti ei l’USSI2 ida en avantatg ella 15avla minuta, suenter in foul d’in defensur dil CB Surses. Gian Sgier ha surmuntau il goli digl adversari cun in siet plazzau el cantun dretg. Aschia eis ei iu ella cabina cun in resultat da pausa da 1:0 per l’equipa da casa.

Ella secunda mesadad ei il giug staus in tec pli attractivs che avon la pausa, grazia a dapli pusseivladads da marcar gols. Suenter 68 minutas ha Ronny Della Morte tratg encunter gol dalla vart dretga e traplau il goli da Surses el cantun cuort – 2:0 per l’equipa da Corsin Derungs. Malgrad pliras bunas schanzas da marcar per omisduas equipas encunter la fin dil giug eis ei stau tier quei resultat. Aschia restan ils treis puncts a Schluein ed han buc da far il viadi el Surmir.

En duas jamnas frunta l’USSI 2 silla secunda da Domat, ils 23-09-2018 allas 15:00 a Domat.

US Schluein Ilanz 2 – CB Surses 2:0 (1:0)
Crap Gries, Schluein

Gols: 15. Gian Sgier (penalti) 1:0, 68. Ronny Della Morte 2:0

US Schluein Ilanz 2: Flurin Capaul; Dario Casutt, Patrick Camenisch, Marc Camenisch, Sven Brasser; Ronny Della Morte (81. Livio Casutt), Gian Sgier, Arno Panier (85. Curdin Bundi), Fabian Coray (46. Sadat Hares); Mauro Arpagaus (75. Ronny Panier), Dario “tscharva” Derungs (90. Roni “tigher” Caminada)

Remarcas: admoniziuns USSI 2: 78. Ronny Della Morte (sittar naven la balla); 74. siet alla traversa da CB Surses; 82. big save da Flurin Caupaul