La partenza el campiunadi 2018/19 ei definitivamein gartegiada all’equipa da Schluein Glion. El tierz giug ha ei dau sonda vargada encunter Eschen/Mauren 2 la tiarza victoria e quella gada schizun senza survegnir in gol.
Exact ina minuta e sedisch secundas ha Schluein Glion duvrau per sittar igl emprem gol encunter l’equipa dil principadi dil Lichtenstein. Marino Cavegn ei vegnius lantschaus en l’ala dretga e sia flanca ei setschenda per surpresa dil goli dils hosps – che era postaus empau memia anavon – bi el cantun ault liung. Suenter quella partenza optimala ha l’equipa indigena dominau il giug senza difficultads ni schar schanzas als hosps ed alzau il resultad entochen pausa sin 3:0. Il 2:0 ha il defensur Stephan Berni sittau, el ha menau suenter 27 minutas in culp liber da Luca Vinzens cul tgau en la reit. Quei cuort suenter che Tiziano Vinzens haveva tuccau cun in siet da distanza mo la petga. Il medem giugadur ha diesch minutas avon pausa mussau in solo sur la vart seniastra e surviu la balla a Serafin Bundi che ha cun grond engaschi tuschau la balla ord cuorta distanza sur lingia en al 3:0.
Suenter pausa ha l’equipa indigena priu il giug empau pli patgific. Ella ha controllau la balla ed igl adversari e ha buca encuretg cun tutta vehemenza d’alzar il resultad. L’equipa d’Eschen/Mauren ha buca saviu nezegiar quei ed ei era en la secunda mesadad strusch vegnida malsegira avon il gol da David Hornacek. Sulettamein inagada ha lez astgau mussar sia classa cun frenar in siet ord cuorta distanza cun ina reacziun sperta. Empau colur al giug ha persuenter igl arbiter dau en la secunda mesadad. Naven dalla 58avla entochen la 95avla minuta ha el numnadamein mussau buca meins che nov cartas mellnas en in giug plascheivel cun strusch in soli foul grob ni agressiv!
US Schluein Glion – USV Eschen/Mauren 3:0 (3:0)
Crap Gries. – 222 aspectaturs. – AR: Ajidini
Gols: 1. Marino Cavegn 1:0, 27. Berni 2:0, 35. Bundi 3:0.
Schluein Glion: Hornacek; Dermont, Berni (84. Matthias Derungs), Livio Derungs, Silvan Welter; Bundi, Luca Vinzens, Marino Cavegn, Tiziano Vinzens (77. Sergio Welter); Caldeira (63. Tschalèr), Caduff (73. Fabrizio Cavegn).
Eschen/Mauren: Majer; Ubavic, Odobasic, Severin Weibel, Nipp (64. Frederik Weibel); Dennis Demirci (73. Ok), Bleisch (86. Ugrica), Eris (46. Dincer), Sangrigoli (82. Andre Demirci); Kardesoglu, Pattocchio (59. Bolat).
Remarcas: Schluein Glion senza Andreoli (blessaus). – Cartas mellnas: 58. Caldeira (nunsportivadad), 62. Berni (foul), 69. Dennis Demirci (reclamar), 78. Sangrigoli (foul), 81. Bundi (foul), 87. Fabrizio Cavegn (foul), 90. Luca Vinzens (foul), 90. Bolat (nunsportivadad). – 26. siet en la petga da Tiziano Vinzens. – Corners: 3:3.