El secund giug da casa dalla sesiun 2018/19 ha l’USSI 2 survegniu ina slaffada dils hosps engiadines e spiars cun 0:3. Tenor la prestaziun mussada ei il resultat curdaus o memia aults, anzi, silmeins in punct havess l’equipa da casa giu fadegiau.
Suenter in’entschatta plitost ruasseivla ei nossa secunda vegnida da crear pliras bunas schanzas da marcar. En emprema lingia grazia a Ronny Della Morte e Mauro Arpagaus che han surpassau ina ni l’autra gada igl adversari cun lur spertadad. Sil pli tard dil goli dil FC Celerina ein els denton mintgaga vegni frenai. Co ei capeta savens en talas situaziuns ch’ins vegn buc da stuschar sez la balla sur la lingia vi, ei igl adversari da Celerina ius en avantatg ella 37avla minuta. Quei gol ei staus in schenghetg da nossa defensiun, damai ch’in pass anavos en direcziun goli ei gartegiaus memia cuorts ed igl attacader da Celerina ha pudiu tier la balla. Era suenter quei gol eis ei vinavon el medem stil, aschia che las equipas ein idas en cabina da pausa cun in resultat da 0:1.
Ella secunda mesadad ha Dario Derungs purtau niev slontsch el giug. Cun sia postura ha la “tscharva” pudiu tier entgina balla aulta cul tgau. In gol ha era buc vuliu gartegiar ad el, ella 51avla minuta ei in culp cul tgau setschentaus vid la petga enstagl ella reit. Buc gitg pli tard han ils Engiadines saviu profitar d’in penalti schulaus plitost stregn digl arbiter. Flurin Capaul che haveva gia teniu in penalti en quella sesiun ha sminau igl endretg cantun, denton buc giu schanza d’evitar il 0:2 ord vesta da sia equipa. Era suenter quei gol ha l’USSI 2 buc dau si. Cun ina formaziun aunc pli offensiva han els empruau da haver success, tgei ch’ei vinavon buc reussiu. Ella 90avla minuta ha il FC Celerina saviu marcar il 3:0, la decisiun definitiva en quei giug.
En in ulteriur derby interromontsch frunta la secunda dall’USSI sil CB Surses, sonda ils 08-09-2018 allas 18:00 a Schluein.
US Schluein Ilanz 2 – FC Celerina 0:3 (0:1)
Crap Gries, Schluein
Gols: 37. FC Celerina 0:1, 66. FC Celerina 0:2, 90. FC Celerina 0:3
US Schluein Ilanz 2: Flurin Capaul; Dario Casutt, Patrick Camenisch, Marc Camenisch, Robin Studer (78. Curdin Bundi); Ivan Derungs (50. Dario Derungs); Tizian Casanova (50. Fabrizio Bonolini), Fabian Coray, Arno Panier, Ronny Della Morte (71. Sadat Hares); Mauro Arpagaus
Remarcas: admoniziuns USSI 2: 33. Arno Panier (foul), 45 +2 Fabian Coray (foul), 56. Marc Camenisch (foul); 51. culp cul tgau da Dario Derungs alla petga, 55. siet alla traversa da FC Celerina; USSI 2 ei vegnida trenada dil cotrenader Silvan Frehner muort absenza dil cautrenader Corsin Derungs