Suverana prestaziun entochen 10 minutas avon la fin

En Glaruna – sin in plaz pign e maluliv – ha Schluein Glion dominau e controllau il giug dalla sonda vargada entochen bunamein alla fin. Pér en las davosas minutas han ils indigens cun grond engaschi saviu procurar cun ballas liungas per empau malruasseivladad en la da sedisch da Schluein Glion. Per dar ina viulta al giug ha quei denton buca tunschiu.

Beinsavend che l’equipa da casa detti in ballapei cumbattiv cun sittar la balla aschi spert sco pusseivel en la zona da puniziun digl adversari ha Schluein Glion dau naven dall’entschatta gronda breigia da controllar la balla. Buca far sbagls e piarder ballas malprecautamein ei stau la devisa. Quei ei reussiu stupent, aschia ch’ils indigens han en l’entira emprema mesadad giu buc ina scena malsegira en l‘offensiva. Schluein Glion ha persuenter caschunau cun spertas cumbinaziuns sur pliras staziuns enqual gadas per schischuris en la defensiun da Netstal. Gols ha ei denton dau mo in en l’emprema mesadad. Quel ha il giugadur-trenader Alessandro Giacomelli sittau. El ei vegnius lantschaus en l’ala dretga e siu siet ei vegnius deviaus dad in defensur levamein sper il goli vi en la reit.

Era en la secunda mesadad ha Schluein Glion controllau il giug e beinspert sittau il secund gol. Lars Caduff ha menau in culp liber da Luca Vinzens cul tgau el cantun liung e mussau ch’era ils attaccaders sursilvans san far gols cul tgau. Suenter quella frida han ils indigens intensivau lur activitads offensivas, quei che ha dau a Schluein Glion dapli plaz per spertas cunterattaccas. Igl ei denton buca reussiu – malgrad pliras bunas caschuns – da sittar il tierz gol ed aschia decider il giug definitivamein. Il indigens han ord quei motiv adina sperau d’aunc saver dar ina midada al giug. Ellas davosas minutas han ei fiers tut anavon ed aschia sittau en la secunda minuta dil temps supplementar entras Adnan Jashari il 1:2. Per dapli ha ei denton buca tunschiu. L’equipa da Schluein Glion gudogna aschia era siu secund giug ed astga esser cuntenta cun la partenza el campiunadi 2018/19.

FC Netstal – US Schluein Glion 1:2 (0:1)

Wiggis. – 35 aspectaturs. – AR: Goran

Gols: 21. Giacomelli 0:1, 62. Caduff 0:2; 90. + 2. Jashari 1:2.

Netstal: Janosch; Reumer, Stauffer (85. Sevic), Pfeiffer, Zweifel (65. Sauter); Jashari, Kormann (80. Costa Pereira), Sevic (56. Barbieri), Cotardi (73. Schneider); Lopes Texeira, Toprakkale.

Schluein Glion: Hornacek; Dermont (42. Sergio Welter), Berni, Livio Derungs, Silvan Welter; Bundi (88. Matthias Derungs), Luca Vinzens (74. Fabrizio Cavegn), Marino Cavegn (81. Airaghi), Tiziano Vinzens; Giacomelli, Tschalèr (54. Caduff).

Remarcas: Schluein Glion senza Andreoli e Caldeira (blessai). – Cartas mellnas: 60. Reumer (foul), 60. Silvan Welter (reclamar), 71. Luca Vinzens (foul), 89. Airaghi (foul), 90.+6. Hornacek (retardar il giug). – 42. Dermont croda ora muort blessura. – 70. siet en la petga (Netstal). – Corners: 4:7.

Rapport: Beat Dermont