Encunter il CB Laax ha l’USSI 2 schau scher pliras gadas puncts impurtonts ellas sesiuns vargadas. Quella gada eis ei stau auter: Cun in resultat final da 6:0 ha l’USSI 2 tarmess a casa igl adversari ed aschia gudignau igl emprem derby dalla sesiun.
Suenter la terrada dalla fin d’jamna vargada ein ils giugadurs dall’equipa da casa stai motivai e semtgai da recaltgar ils emprems puncts dalla sesiun. Naven dall’emprema minuta han els surpriu il commando e creau pusseivladads da marcar. Aschia ei Noah Weber vegnius da stuschar la balla sper il goli da Laax vi gia ella quarta minuta. Sin il 2:0 han ils aspectaturs stuiu spitgar pli gitg. Suenter pliras bunas acziuns e schanzas munchentadas eis ei finalmein reussiu a Mauro Arpagaus d’alzar il resultat cun in siet plazzau ella 44avla minuta.
Era ella secunda mesadad han ils giugadurs da Laax schau da bia plaz a lur adversaris. All’USSI 2 ha denton il pass decisiv final ni la precisiun muncau ella gronda part dallas acziuns. Grazia ad in culp liber bein plazzau da Robin Studer, che ha menau al 3:0 ella 69avla minuta, ein els tuttina vegni da francar anticipadamein la victoria. Ellas davosas bien 15 minutas ein aunc treis ulterius gols curdai per l’equipa da casa, pil pli pussibilitai digl adversari cun sbagls individuals. Denter auter ha Sadat Hares saviu sittau siu emprem gol per nies club.
Segir e franc ha nossa secunda saviu tancar morala en quei giug. Il CB Laax ha denton buc fatg fetg greva la veta ad els. Per saver tener petg als adversaris che suondan ston entginas caussas aunc vegnir migliuradas. El proxim giug frunta la secunda dall’USSI sil FC Celerina, dumengia ils 02-09-2018 allas 16:00 a Schluein.
US Schluein Ilanz 2 – CB Laax 6:0 (2:0)
Crap Gries, Schluein
Gols:: 4. Noah Weber 1:0, 44. Mauro Arpagaus 2:0, 69. Robin Studer 3:0, 74. autogol Mattias Zurbriggen 4:0, 89. Sadat Hares 5:0, 90 Livio Casutt 6:0
US Schluein Ilanz 2: Flurin Capaul; Dario Casutt (56. Cedric Wellinger), Patrick Camenisch (75. Ronny Panier), Marc Camenisch, Robin Studer; Noah Weber (73. Livio Casutt), Fabian Coray, Arno Panier, Ronny Della Morte (75. Sadat Hares); Mauro Arpagaus (70. Ivan Derungs), Dario Derungs
Remarcas: neginas admoniziuns, 87. siet alla traversa da D. Andreoli (CB Laax)
Rapport: Marco Cavegn