A Schluein Glion ei la partenza en il niev campiunadi gartegiada. Encunter il club da Domat, châei vegnius relegaus dalla secunda ligia, ha ei dau a casa ina victoria da 3:1. Dus giugadurs novs han sittau igl emprem ed il tierz gol e schenghegiau al niev trenader, Alessandro Giacomelli, ina buna entschatta encunter siu anteriur club.
Duas equipas che vegnan omisduas taxadas sco capavlas da cuntonscher in plaz denter ils emprems treis en la tabella ein fruntadas gia egl emprem giug da campiunadi ina sin lâautra. Il giug ha entschiet ualti ulivau senza grondas caschuns da marcar sin omisduas varts. En la 17avla minuta ha in giugadur da miez da Domat piars la balla enten baghegiar si in attacca. La balla ei setschentada tier Daniel Lopes Caldeira, il qual ha buca studegiau gitg e marcau da rodund vegn meters cun in siet franc e plazzau igl 1:0. Suenter quei gol ha Domat mussau ina reacziun e surpriu per in mument il domini dil giug senza denton saver scaffir grondas occasiuns da sittar gols. Anzi, Schluein Glion ha cuort avon la mesa ura da giug, giu entras Tiziano Vinzens la gronda caschun dâalzar il resultad. Enstagl sittar in bi pass diagonal direct da gol en ha el targlinau in mument, aschia châin defensur ha el davos mument saviu bloccar il siet. La gronda caschun per Domat ei seresultada ord in culp liber. Lebien Nsingui ha alzau il siet da pressapauc vegn meters bein sur il mir vi en la petga. Cletg per Schluein Glion.
En la secunda mesadad ha lâequipa da casa beinspert alzau il resultad. Suenter ina biala cumbinaziun sur pliras staziuns han Tiziano Vinzens e Serafin Bundi aunc brigliau cun in pass dubel, aschia che il davosnumnau ha mo pli stuiu tuschar la balla el gol vit. Suenter quei gol ha Domat reagau vehement ed empruau cun tuts rampins lubi e buca lubi da vegnir al success. E veramein la tiarza gada châin giugadur ei ruclaus cun gronda canera ed empau inschign en la da sedisch dils indigens a tiara ha igl arbiter schulau in penalti. Quei fuss stau la caschun per aunc dar ina viulta al giug, mo il goli da Schluein Glion ha buca vuliu schar tier quei. Cun ina biala parada ha el teniu il siet e la nulla sin la tabla da gols.
Cunquei che Domat ha silsuenter stuiu fierer tut anavon ei Schluein Glion vegnius pliras gadas tier bunas cunterattaccas. Ina da quellas ha en la davosa minuta lu era menau al tierz gol. La balla ei vegnida transportada sur pliras staziuns spert anavon. La finala ha Raffaele Airaghi stuschau la balla traviers a Fabrizio Cavegn, che ha naven dalla lingia da sedisch sittau tala cool ed excat sper il goli vi en la reit. Sco in vegl rutinier, era schâel ha mo sedisch onns! Il gol da Domat en la secunda minuta dalla prolungaziun ei lu mo aunc staus cosmetica e seresultaus ord ina malcapientscha en la defensiun.
US Schluein Glion â FC Domat/Ems 3:1 (1:0)
Crap Gries. â 215 aspectaturs. â AR: Lekaj
Gols: 17. Caldeira 1:0, 52. Bundi 2:0, 90. Fabrizio Cavegn 3:0, 90.+ 2. Karamese 3:1.
Schluein Glion: Capaul; Dermont, Berni, Livio Derungs, Welter; Bundi (75. Airaghi), Luca Vinzens, Marino Cavegn, Tiziano Vinzens (84. Giacomelli); Caldeira (80. Fabrizio Cavegn), TschalĂšr (66. Caduff).
Domat/Ems: Chande; Caluori, Karamese, Corucci, Salihagic; Dragic, Frizzoni, Klopic (76. Novo), Trevisan; Brunner (78. Mitrovic), Nsingui.
Remarcas: Schluein Glion senza Hornacek, Matthias Derungs (absents), Andreoli (blessaus). â Cartas mellnas: 37. Corruci (foul), 50. Berni (reclamar), 53. Derungs (foul), 72. Caldeira (foul), 90.+2. Karamese (nunsportivadad), 90.+ 4. Lebien (foul), Trevisan (nunsportivadad). â 35. Nsingui setta culp liber en la petga; 66. Capaul tegn penalti sittaus da Karamese. â Corners: 4:7.