La sonda vargada ein 36 equipas dallas annadas 2007 e 2008 ord gl’entir cantun Grischun semiseradas a Tusaun/Cazas per eruir il campiun da nies cantun.
L’equipa da Schluein/Glion ha entschiet il turnier cun ina terrada. Mo suenter quei giug ein els vegni allerta ed ein silsuenter i da victoria tier victoria. El miez final han els battiu lur concurrents da Domat cun in clar 4 ad 1. El final ein els lu vegni confruntai cull’equipa da Cuera che dat in ballapei fetg tecnic. Ils Sursilvans han giugau in ballapei fetg spert, aschia ch’ils da Cuera han buca giu la schanza da metter entuorn lur tecnica. Suenter entginas minutas menava l’USSI cun 2 gols. Cuort avon la fin dil giug eisi aunc gartegiau als da Cuera da far in gol – mo memia tard. Cun 2 ad 1 ei la victoria ida meritadamein als juniors da Schluein Glion che san aschia purtar a casa il buccal e festivar il tetel da campiuns grischuns.
Retscha davos: Guido Tschuor (trenader), Diego Oswald, Eric Ferreira, Baldur Schmid, Fabio Sac, Lucas Marques, Vendelin Cabernard (trenader)
Retscha davon: Flurin Klaiss, Gian Andrea Schmid, David Flurin Cabernard, Alessio Langhi, Andri Tschuor