La secunda euqipa da Schluein Glion ha munchentau da far il pass en tiarza ligia. El giug encunter il CB Lumenzia eis ei buca gartegiau ad omisduas equipas da sittar in gol, aschia che l’equipa dalla Lumnezia ei vegnida promovida. Muncau ha denton mo pauc, en la 34avla minuta ha Mauro Arpagaus numnadamein tuccau cun in bellezia siet direct da bien 18 meters mo la traversa! Tgisà sch’ei havess tunschiu da gudignar sche quei siet fuss ius en gol? Aschia descha ei da gratular al CB Lumnezia per la promoziun e giavischar ad els bien success en tiarza ligia.
Il giug ha avon la biala culissa da 560 amitgas ed amitgs dil ballapei entschiet ualti nervus sin omisduas varts. Ei pareva che la gronda culissa e l’impurtonza dil giug ha schau tremblar la comba a beinenqualin giugadur. La consequenza ein massa pass falli e strusch ina occasiun da marcar stai. La megliera occasiun ei segir il siet en la traversa da Mauro Arpagaus staus, il qual ei gia vegnius numnaus.
Era en la secunda mesadad eis ei buca vegniu bia meglier. Occasiuns da marcar han ins vinavon stuiu encurir cun la marella. Per cuort avon la fin, cura che Schluein Glion ei vegnius empau pli offensivs, ha ei aunc dau in pau colur al giug. Per dapli ch’ina schanza per ils indigens e ina ni duas cunterattaccas dils hosps cun bunas pusseivladads da marcar ha ei denton buca tunschiu, aschia ch’igl giug ei ius a fin cul resultad da 0:0.
Era sch’igl ei buca gartegiau a l‘equipa da Schluein Glion da far il pass en tiarza ligia ha la „secunda“ da Schluein Glion, sco l’equipa vegn numnada, puspei mussau in oreifer bien campiunadi e terminau quel sco igl onn vargau sil secund plaz. Cordiala gratulaziun, cunzun per las bunas prestaziuns els derbis sursilvans. Da otg derbis ei numnadamein mo in vegnius piars (encunter Val a casa!), treis ha l’equipa gudignau e quater gadas ha ella giugau remis els derbis – forsa ina gada da memia?
Bien engraziament era als dus trenaders partents. Marcus Büchler sco cautrenader e Maurus Vinzens sco assistent han prestau fetg buna lavur cun lur equipa e merettan persuenter in laud. Donn ch’els vulan buca prolunghir lur carriera.
US Schluein Glion 2 – CB Lumnezia 1 0:0 (0:0)
Crap Gries, Schluein. – 560 aspectaturs. – AR: Hamzic
Gols: Hai buca dau!
Schluein Glion: Cavegn; Casutt, Arno Panier (40. Brasser), Marc Camenisch, Patrick Camenisch; Berni, Sgier, Coray (43. Bonolini), Weber (77. Derungs); Della Morte, Arpagaus.
Lumnezia: Mark; Capaul, Ursin Derungs, Gion Alig, Paul Alig (72. Marc Pascal Derungs); Danilo Blumenthal (81. Nando Blumenthal), Mauro Demont, Collenberg (85. Cadonau), Matias Alig, Dino Blumenthal; Yanick Demont.
Remarcas: Cartas mellnas: 18. Patrick Camenisch (foul), 52. Mauro Demont (foul), 79. Ursin Derungs (foul), 85. Collenberg (foul). – 34. siet en la traversa Schluein Glion (Arpagaus).