„Oz drovel jeu buca savun per far la duscha“, quels plaids dil goli da Schluein Glion suenter il giug encunter Sargans gin atgnamein tut. Buc’ina soli suletta parada ha el stuiu mussar el giug encunter il quart dalla tabella Sargans, il qual ei dil reminent vegnius daus dumengia suentermiezgi da gronda calira. Tuttina ha ei buca tunschiu da gudignar il giug! Il goli da Schluein Glion ei numnadamein vegnius battius cuort suenter pausa d’in agen giugadur e davontier han ses congiugadurs puspei munchentau pliras bunas schanzas.
Naven dall’entschatta ha Schluein Glion priu il giug entamaun e dominau Sargans tenor giavisch. Pliras bialas attaccas ein vegnidas inscenadas, allas qualas mo enzatgei ha muncau: il siet decisiv en la reit dil gol digl adversari. Aschia steva ei da pausa aunc adina 0:0. Strusch sil plaz suenter pausa ha Sargans lantschau ina attacca sur la vart seniastra ed il bal sittaus bass en la da tschun ei vegnius menaus d’in defensur da Schluein Glion dil agen gol en! Strusch da crer: Schluein Glion creescha ina schanza suenter l’autra e vegn buca da sittar in gol, Sargans ha atgnamein neginas schanzas e va tuttina en avantatg! Suenter quei gol surpren l’equipa dalla Surselva puspei il domini e tut va vinavon sco avon pausa. En la 75avla minuta croda lu finalmein il gol dall’egalisaziun, ei drova denton in penalti – suenter ch’in defensur da Sargans ha frenau ina flanca da Tiziano Vinzens cun siu bratsch – per che quei gol crodi. Luca Vinzens nezegia la caschun e procura aschia che Schluein Glion resta sil tierz plaz en la tabella e ha tuttas schanzas da terminar il campiunadi denter ils emprems treis dalla gruppa 1 dalla tiarza ligia.
FC Sargans – US Schluein Glion 1:1 (0:0)
Riet. – 140 aspectaturs. – AR: Berisa
Gols: 49. Autogol (Livio Derungs) 1:0, 75. Luca Vinzens 1:1 (penalti).
Sargans: Dosch; Raimann (46. Berisha), Weber, Kreis, Schai (Ralph Schumacher); René Walser, Armando Mullis, Marco Walser, Giordano; Ronny Schumacher (76. Spillmann), Christoph Mullis (69. Grünenfelder).
Schluein Glion: Hornacek; Dermont, Livio Derungs, Welter; Ramon Derungs, Luca Vinzens, Andreoli, Tiziano Vinzens (84. Brasser); Gabriel Derungs (69. Coray), Caduff.
Remarcas: Schluein Glion senza Camenisch e Wellinger (reconvalescents). – Cartas mellnas: 65. Kreis (foul), 74. Weber (maun), 84. Livio Derungs (foul). – Corners: 3:8.