Encunter ina fetg mediocra equipa da Flums che cumbatta aunc encunter la relegaziun spiarda Schluein Glion cun 0:3. L’emprema mesadad ha Schluein Glion dominau, en la secunda mesadad ha l’equipa sursilvana denton mussau in giug fetg nunmotivau cun biars sbagls e malcapientschas.
Ignacio Novoa, il giugadur-trenader da Flums ed anteriur caposettagols en secunda ligia, ha decidiu il giug encunter Schluein Glion en favur da sia equipa. Cuort suenter pausa ha el sittau cun in culp liber bein plazzau siu emprem gol. Suenter ina buna ura eis el mitschaus ord ina posiziun che ha ferdau ferm suenter offside e ha battiu il davos um da Schluein Glion cun in siet da sedisch metters el cantun ault al 2:0 ed en la 73. minuta ha el plazzau in ulteriur culp liber el cantun ault. Quel ha David Hornacek menau en la petga. Da tala ei la balla rebattida sil tgau da Argjent Sadiki, il qual ha buca giu breigia da marcar il 3:0. Tier quei resultad eis ei restau entochen alla fin. Schluein Glion ha bein sespruau da volver il giug, quei ei denton buca gartegiau. Memia pauc decisivas e precisas ein tut las attaccas stadas, aschia che ils indigens ein strusch vegni en grondas difficultads da gudignar treis impurtonts puncts encunter la relegaziun.
FC Flums – US Schluein Glion 3:0 (0:0)
Banau. – 105 aspectaturs. – AR: Oliva
Gols: 46. Novoa 1:0, 66. Novoa 2:0, 73. Sadiki 3:0.
Flums: Indergand; Kurath, Mullis, Krasnici (79. Abger), Schaffhauser; Bless, Andreas Nadig, Roger Herrmann (46. Sadiki), Rico Nadig (61. Dort); Gomes (82. Walser), Novoa (85. Haliti).
Schluein Glion: Hornacek; Cavegn, Berni, Livio Derungs, Welter; Bundi (57. Tschalèr), Dermont (46. Ramon Derungs), Luca Vinzens (75. Brasser), Andreoli (46. Tiziano Vinzens); Gabriel Derungs (75. Bundi), Caduff.
Remarcas: Schluein Glion senza Camenisch e Wellinger (reconvalescents). – Cartas mellnas: 42. Dermont (foul), 44. Hermann (foul), 47. Bless (foul), 73. Berni (reclamar), 88. Ramon Derungs (foul). – 63. siet en la traversa Novoa. – Corners: 4:6.