Finalmein puspei ina buna prestaziun offensiva da Schluein Glion. En la 58avla minuta ha Patric Andreoli tuccau cun in siet direct da distanza fermamein la traversa ed inizialisau aschia ina buna mesa ura da Schluein Glion che ha purtau entginas bialas e spertas attaccas cun quater gols e la victoria encunter il capogruppa Linth 04 2.
Schluein Glion ha entschiet per l’emprema gada questa primavera cul sistem 4:3:3 e sperau che quei sistem porti stabilitad alla defensiun che ha incassau la davosa fin d’jamna tschun gols. La defensiun ha lu era fatg ina pareta ualti segira, l’offensiva ha denton pitiu empau pervia da quella midada da sistem. Memia plaun vegneva la balla purtada anavon, aschia ch’ils hosps havevan buca gronda breigia da defender lur gol e sez vegnir tier enqual caschun da marcar cun attaccar baul e consequent igl adversari. Ina da quellas attaccas ha lu era menau agl 0:1. In pass anavos dalla defensiun indigena ei buca gartegiaus ed in giugadur da Linth 04 ha saviu cuorer cun la balla dall’ala seniastra si e tuschar ella avon gol, nua che Francesco Fragapane ha menau ella sur lingia en.
Da pausa ha il trenader da Schluein Glion midau anavos tier il sistem usitau da 3:5:2 e midau en dus giugadurs novs. Quei ha purtau niev elan als indigens che han naven dalla 58avla, cun il siet en la traversa gia descret sco signal da partenza, mussau ina fetg buna prestaziun offensiva. Suenter bien in ura ha il giuven Marino Cavegn nezegiau duas caschuns da marcar en stil d’in rutinier. Cun siets ferms e plazzai ha el duas gadas schau negina pusseivladad da tener al goli da Linth 04 e vulviu aschia il giug. Mo ina minuta suenter ch’el ei vegnius sil plaz ha Tiziano Vinzens sittau siu emprem gol questa primavera ed alzau il resultad al 3:1. Diesch minutas avon la fin ha Tiziano Vinzens lantschau cun in bellezia pass diagonal siu frar Luca, il qual ha controllau bein la balla e tarmess cun in pass en la profunditad il caposettagols Gabriel Derungs. Lez ha controllau la balla e stuschau ella sper il goli vi al resultad final. Cun la buna prestaziun dalla secunda mesadad ha Schluein Glion meritau la victoria ed aschia puspei dau empau tensiun al campiunadi da tiarza ligia.
US Schluein Glion – FC Linth 04 2 4:1 (0:1)
Crap Gries, Schluein. – 275 aspectaturs. – AR: Sidler
Gols: 32. Fragapane 0:1, 66. Cavegn 1:1, 67. Cavegn 2:1, 72. Tiziano Vinzens 3:1, 80. Gabriel Derungs 4:1.
Schluein Glion: Hornacek; Welter, Berni, Livio Derungs, Dermont; Cavegn (71. Tiziano Vinzens), Bundi, Luca Vinzens (81. Casanova, 86. Caduff); Tschalèr (46. Andreoli), Caduff (80. Bonolini), Airaghi (46. Gabriel Derungs).
Linth 04 2: Milic; Landolt, Bänz (69. Kartal), Miljic, Brunner; Fragapane, Bisig, Baumhackl (35. De Abreu Lima), Redzepi (77. Stadler); Schindler, Hofer.
Remarcas: Schluein Glion senza Dennis Camenisch (reconvalescents) e Ramon Derungs (serraus). – Cartas mellnas: 50. Bisig (reclamar), 55. De Abreu Lima (foul), 87. Caduff (foul). – 58. siet en la traversa (Andreoli). – 86. Casanova croda ora blessaus. – Corners: 4:6.