Ina terrada meritada per Schluein Glion

Schluein Glon piarda giu a Bogn Ragaz per l’emprema gada questa primavera. Mo la terrada ei stada meritada. Cunzun en la secunda mesadad ha la defensiva mussau dabia fleivlezias e fatg brav sempel als attaccaders indigens da sittar gols.

Il giug ha gia buca entschiet en fetg empermettend per l’equipa Sursilvana. Sco el giug da cup dalla jamna vargada, ch’ei vegnius spiars encunter la AC Moesa, ha ella surschau il domini dil giug als indigens, ils quals han fatg cul ferm vent el dies gronda pressiun ed aschia provocau sbagls en la defenisun da Schluein Glion. In da quels sbagls ha menau en la 15avla minuta agl emprem gol. Marco Mühlebach ha saviu menar la balla ord cuorta distanza da gol en suenter in pass en dall’ala seniastra. Mo duas minutas pli tard havess Bogn Ragaz saviu alzar il resultad. Zivan Mitrovic ha denton buca rabitschau in penalti sper David Hornacek vi, il qual ha reagau excellent e menau la balla en corner.
Suenter pausa cul vent el dies han tuts ils fans da Schluein Glion spitgau che lur equipa volvi il giug. Quei ei denton buca stau il cass. Anzi, cun ulteriurs sbagls en la defensiva han tala fatg lev a Bogn Ragaz da sittar aunc quater gols e cun dabia pass falli e malexactadads en l’offensiva eis ei mai gartegiau da far gronda pressiun e da scaffir grondas caschuns da sittar gols. Da menziunar ei sulettamein aunc il gol da honur da Gabriel Derungs. Cun gronda classa ha el sittau la balla cun in culp liber da biabein 20 meters direct el cantun ault dretg al 3:1. Mo treis minutas pli tard ei denton il 4:1 curdaus per Bogn Ragaz, aschia ch’il giug ei staus decidius.

FC Bogn Ragaz – US Schluein Glion 5:1 (1:0)

Ri-Au. – 115 aspectaturs. – AR: Giezendanner

Gols: 16. MĂĽhlebach 1:0, 51. Mitrovic 2:0, 57. Rauti 3:0, 63. Gabriel Derungs 3:1, 66. Rauti 4:1, 82. Mitrovic 5:1.

Bogn Ragaz: Ambühl; Bersorger (52. Rauti), Kohler, Michael Caluori, Gerber; Horni (81. Bersorger), Mühlebach, Näf, Orlando Caluori (72. Zollino); Cabalzar (85. Antunovic), Mitrovic.

Schluein Glion: Hornacek; Casanova, Bundi, Berni (44. Luca Vinzens); Dermont (88. Brasser), Ramon Derungs, Cavegn, Tschalèr, Tiziano Vinzens; Gabriel Derungs (70. Andreoli), Caduff.

Remarcas: Schluein Glion senza Livio Derungs, Dennis Camenisch, Silvan Welter, Cedric Wellinger (tuts blessai ni reconvalescents). – Cartas mellnas: 30. Ramon Derungs (foul), 49. Horni (foul), 64. Rauti (foul). – 71. siet en la latta Tiziano Vinzens, 84. siet cul tgau da Tschalèr vegn deviaus en la latta. – Corners: 8:10.