Negin final per Schluein Glion

Nuot eis ei stau cun gudignar il cup grischun per la secunda gada en seria! Schluein Glion ha piars mesjamna sera il miezfinal a Lostallo encunter il club da tiarza ligia AC Moesa cun 0:1 e munchenta aschia il final.

Tgi che ei buca vegnius ad uras sin las otg dalla sera sil Campo La Capella a Lostallo ha munchentau igl essenzial! Il sulet e perquei era decisiv gol dalla partida ei numnadamein curdaus suenter mo exact 17 secundas! Strusch da crer mo ver. Ei ha pariu ch’ils giugadurs indigens seigien gia alerts e motivai sil plaz ed ils giugadurs dalla Surselva aunc enzanua sin la via dil s. Bernardino. Era suenter quei gol han ils indigens numnadamein dominau il giug cun cumbatter per mintga balla e metter sut pressiun mintga soli giugadur dils hosps immediatamein. Aschia ha Schluein Glion duvrau bunamein vegn minutas per vegnir tier lur emprema caschun da sittar sin gol. Naven da quei mument ei il giug vegnius pli equilibraus, ils indigens han denton giu entochen tier la pausa pliras bunas caschuns da marcar in secund gol, senza reussir.

Suenter il té ha Schluein Glion lu surpriu pli e pli il domini dil giug. Ils indigens ein seretratgs en la defensiun ed ein seconcentrai da vegnir al success cun spertas cunterattaccas. Quellas ein denton buca stadas fetg decisivas ed era als attaccaders da Schluein Glion eis ei buca gartegiau da crear grond malruaus avon il gol da Moesa, aschia ch’igl ei stau entochen alla fin tier igl 1:0 cun in gol sittaus suenter mo 17 secundas!

Miezfinal Cup grischun

AC Moesa – US Schluein Glion 1:0 (1:0)

La Capella, Lostallo – 35 aspectaturs – SR: Ferrari, Lugano.

Gol: 1. Teo Cereghetti 1:0.

Moesa: De Ritz; Bassi, Carvalho Fernandes, Berri (60. Giudicetti), Tavasci (74. Papa); Kronauer, Decristophoris, Ron Cereghetti (66. Ambrosini), Rizzi; Jolli, Teo Cereghetti.

Schluein Glion: Marco Cavegn; Wellinger, Berni, Welter; Dermont, Bundi, Marino Cavegn (83. Andreoli), Tiziano Vinzens, Luca Vinzens (64. Caduff); Airaghi, Gabriel Derungs.

Remarcas: Schluein Glion senza Livio Derungs, Camenisch, Hornacek (blessai); Ramon Derungs (absents). – Cartas mellnas: 73. Kronauer e Airaghi (foul). – Corners: 9:5.