Ed aunc in remis per Schluein Glion!

Schluein Glion vegn buca pli da gudignar! El tschunavel giug da primavera ha ei dau sonda vargada in ulteriur pari da 1:1, quella gada encunter Tusaun-Cazas. Il giug ei plitost staus da mediocra qualitad, biars cumbats dirs cun dabia fouls ed il ferm vent che ha sufflau duront l’emprema mesadad han strusch lubiu bia dapli.

Ei vala buca da scriver memia bia lingias sur da quei giug. Cul ferm vent el dies ha Tusaun-Cazas fatg all’entschatta pulit pressiun, senza denton vegnir malsegirs. Anzi, ils indigens han giu las meglieras caschuns da sittar gols, quellas ein denton vegnidas munchentadas malamein. Suenter bien mes’ura ha Luca Vinzens astgau sittar in culp liber en la zona da puniziun da Tusaun-Cazas e quei siet ei vegnius deviaus cul tgau d’in defensur ni da Serafin Bundi sur il goli ora en la reit. Cuort suenter ei in attaccader dils hosps vegnius frenaus cun in foul en la zona da puniziun dils indigens, aschia ch’ei ha dau penalti. Cun in siet bass e precis ha Martin Neuhaus nezegiau la caschun d‘egalisar.
Per la secunda mesadad ei il vent tschessaus empau, il giug ei perquei denton buca exnum vegnius megliers. Schluein Glion havess giu la pusseivladad da sittar il gol dalla decisiun, mo quei ei pliras gadas buca gartegiau. La gronda caschun ha Linus Tschalèr giu en la 74avla minuta. Siu siet da cuorta distanza ha il goli denton teniu grondiusamein. Aschia eis ei restau entochen la fin tier il remis da 1:1 ed omisduas equipas han munchentau da scursanir la differenza da puncts sin il capogruppa Linth 04 2 che ha spiars questa fin d’jamna.

US Schluein Glion – FC Tusaun-Cazas 1:1 (1:1)

Crap Gries, Schluein. – 290 aspectaturs. – AR: Dutler

Gols: 31. Serafin Bundi/autogol 1:0, 39. Neuhaus (penalti) 1:1.

Schluein Glion: Hornacek; Berni, Bundi, Welter; Dermont, Ramon Derungs, Cavegn, Luca Vinzens (46. Airaghi), Tiziano Vinzens; Gabriel Derungs (59. Tschalèr), Caduff (84. Andreoli).

Tusaun-Cazas: Patt; Spörri, Brot, Roman Canonica, Sgier (71. Jenny); Nauli (75. Kolaruban), Gashi, Neuhaus, Spiller; Bass (83. Hefti), Fabio Canonica (65. Schweigl).

Remarcas: Schluein Glion senza Livio Derungs e Dennis Camenisch (blessai). – Cartas mellnas: 32. Gashi (foul), 39. Ramon Derungs (foul), 48. Berni (foul), 50. Spiller (nunsportivadad), 68. Nauli (foul), 7. Airaghi (nunsportivadad), 90.+3. Welter (foul). – 74. siet en la petga (Tiziano Vinzens). – Corners: 8:2.