Ei para che Schluein Glion sappi questa primavera buca gudignar ils giugs ordvart. Per la tiarza gada tuornan ils Sursilvans numnadamein mo cun in punct a casa; suenter il pari encunter Valposchiavo ed encunter Landquart ha ei era tunschiu encunter la secunda equipa da Cuera 97 mo per in 1:1.
Da gronda calira ha il giug entschiet plitost ruasseivel. Schluein Glion empruava da baghegiar si il giug ord la defensiun e vegnir aschia tier caschuns da sittar in gol; Cuera 97 disturbava consequent ed sespruava da vegnir al success cun pass liungs. Suenter bien otg minutas havessen ils emprems gols saviu curdar. Igl emprem ei ina flanca d’in attaccader da Cuera 97 setschentada sin la traversa ed suenter la sperta cunterattacca ha Tiziano Vinzens sittau la balla mo per pauc sper il gol vi. In culp liber ha suenter 14 minutas purtau igl avantatg als indigens. A Schluein Glion eis ei buca reussiu da sittar naven la balla, aschia che tala ei la finala curdada a Luca Tino avon il peis, il qual ha saviu marcar da cuorta distanza. A Schluein Glion eis ei era suenter quella „duscha freida“ buca reussiu da vegnir meglier el giug. Memia biars pass falli, memia bia sbagls da concentraziun, memia pauc tempo han buca lubiu da metter ils giugadurs da Cuera grondamein sut pressiun. Anzi ils indigens han adina puspei capiu da neutralisar igl adversari e sez instradar attaccas malsegiras. Percletg ha il goli da Schluein Glion, David Hornacek, mussau pliras gadas ch’el hagi surmontau sia greva blessura e seigi puspei bein en fuorma.
Era suenter pausa han aspectaturas ed aspectaturs viu pli u meins il medem maletg. Schluein Glion empruava da far il giug, Cuera disturbava agressivamein e vegneva aschia regularmein tier malsegiras attaccas, senza denton saver alzar il resultad. Aschia ei suenter bien 79 minutas il gol dall’egalisaziun tuttina aunc curdaus. Ei ha denton duvrau in culp liber e treis siets avon che la balla ei setschentada en la reit. Igl emprem siet ei rebatius dalla traversa, il secund ha il goli da Cuera teniu miraculusamein e pèr cun la tiarza emprova ha Serafin Bundi egalisau da cuorta distanza. En las davosas vegn minutas han omisduas equipas aunc empruau da gudignar il giug. Ils giugadurs sentevan denton da veramein calira immensa – schizun sin la tribuna en l’umbriva era ei strusch da tener ora – pli e pli fetg la stauncladad en combas e tgau ed han perquei munchentau tuttas caschuns da marcar.
Cuera 97 2 – US Schluein Glion 1:1 (1:0)
Ringstrasse, Cuera. – 80 aspectaturs. – AR: Kojadinovic
Gols: 14. Tino 1:0, 71. Bundi 1:1.
Cuera 97 2: Hartmann; Durmisi, Fahling, Theijse, Ipek; Sewer (74. Catricala), Forster, Hofer, Affolter (87. Gjorgjievski); Monteiro (34. Stehlik), Tino (62. Thavapararajah).
Schluein Glion: Hornacek; Berni, Bundi, Welter (71. Wellinger); Dermont, Ramon Derungs, Cavegn, Luca Vinzens (58. Tschalèr), Tiziano Vinzens; Gabriel Derungs, Caduff (84. Gomes Machado).
Remarcas: Schluein Glion senza Livio Derungs e Patric Andreoli (blessai). – Cartas mellnas: 41. Fahling (foul), 70. Sewer (foul), 83. Stehlik (reclamar), 84. Ramon Derungs (foul).