Suenter vegn minutas menava Schluein Glion 1:0, mo 1:0. Atgnamein havessen ils da casa stuiu menar 4 ni schizun 5:0, mo las meglieras schanzas ein vegnidas muchentadas en quellas empremas minutas en seria. Aschia ha Schluein Glion stuiu esser leds da buca incassar en la davosa minuta dalla prolungaziun il gol d’egalisaziun!
Naven dall’emprema minuta han ils indigens priu avon la biala culissa d’aspectaturas ed aspectaturs il giug enta maun e gia suenter quater minutas han ils dus giuvens Marino Cavegn e Lars Caduff procurau suenter ina bellezia cumbinaziun sur pliras staziuns e sur igl entir plaz vi per igl emprem gol. Marino ha alla fin dall’attacca offeriu a Lars il gol sil pei cun in bellezia pass neu dall’ala dretga. Era suenter quei gol ha Schluein Glion dominau tenor giavisch ed elavurau ina pli biala occasiun da marcar suenter l’autra. Mo neginas da quellas ein vegnidas nezegiadas, aschia chei steva da pausa mo 2:0 per ils indigens! El temps da prolungaziun avon la pausa ha Luca Vinzens numnadamein aunc giu empau cumpassiun cun aspectaturas ed aspectaturs e sittau cun bia sentiment e gronda survesta e cun in siet plazzau naven dalla lingia da sedisch il secund gol.
Suenter pausa ha Schluein Glion lu buca cumbinau pli aschi bein anavon. Bein han ils sperts attaccaders aunc saviu crear enqual caschun da marcar, mo buca aschi biaras e forsa era buca aschi claras sco en l’emprema mesadad. Persuenter ei l’equipa da Netstal vegnida empau meglier el giug ed ha saviu sittar suenter in ura in gol. Suenter ch’in attaccader ei vegnius frenaus cun il foul en la zona da puniziun ha Andrea Contardi giu success cun in siet naven dil punct da penalti. Per dapli ha ei denton buca tunschiu a Netstal, era sche ils hosps dalla Glaruna han giu en la davosa minuta aunc ina gronda caschun d’egalisar. Mo per pauc ha in giugadur glarunes munchentau la balla cuort avon la lingia dil gol, aschia che quella ei ruclada sper il gol vi enstagl en la reit.
US Schluein Glion – FC Netstal 2:1 (2:0)
Crap Gries, Schluein. – 255 aspectaturs. – AR: Gorani
Gols: 4. Caduff 1:0, 45.+1. Luca Vinzens 2:0, Andrea Contardi 2:1 (p).
Schluein Glion: Hornacek; Wellinger, Berni, Welter (59. Bundi); Dermont, Ramon Derungs, Cavegn, Luca Vinzens (74. Tschalèr), Tiziano Vinzens (84. Casanova); Gabriel Derungs, Caduff (62. Airaghi).
Netstal: Milano; Sauter (28. Leuzinger), Angelo Contardi, Zweifel, Reumer, Pfeifer (50. Todorovic); Jashari, Kormann (16. Lopes Teixeira), Andrea Contardi, Sevic (58. Cucinelli), Gössi.
Remarcas: Schluein Glion senza Livio Derungs und Patric Andreoli (blessai). – Cartas mellnas: 70. Andrea Contardi (foul), 75. Todorovic (foul), 82. Lopes Teixeira (reclamar), 87. Ramon Derungs (foul).