En in plitost fleivel e lungurus giug han Landquart e Schluein Glion partiu il puncts. Il plaz maluliv e dir ed il ferm vent han segir influenzau la qualitad dil giug, denton l’entira cuolpa sa buca vegnir adossada al plaz ed al vent: bia pass falli e sbagls da controllar la balla han adina puspei rut il ritmus ad omisduas equipas.
En l’emprema mesadad ha ei dau mo ina buna caschun da marcar in gol. Quella ha Schluein Glion giu en la persuna da Gabriel Derungs. Persuls avon il gol eis ei denton buca reussiu ad el da sittar la balla en la reit, in defensur ha el davos mument aunc impediu cun in salvament sin lingia il gol. Per Schluein Glion fuss ei stau impurtont da saver ir en avantatg en quei mument, ils indigens havessan lu numnadamein stuiu arver empau il giug e buca saviu star mo en lur mesadad e specular sin cunterattaccas.
Suenter pausa ha ina da quellas cunterattaccas purtau igl avantatg a Landquart. Stjepan Petrovic ha cuglianau dus defensurs dalla vart dretga e sittau ina biala flanca avon gol, nua che Christoph Maurer
steva tut persuls e ha saviu sittar la balla en la reit. Schluein Glion ha giu tutta breigia da reagar sin quei gol, memia pauc decisivas e precisas eran las attaccas per vegnir al success. Cuort avon la fin dil giug eis ei lu aunc tuttina gartegiau dad egalisar. Suenter in culp liber dalla vart dretga ei la balla vegnida rebattida mo a mesas, aschia che Silvan Welter ha saviu sittar ina flanca avon gol, la quala ei la finala vegnida stuschada dil giuven Aron BĂĽchler cul tgau sur lingia en. Aschia ei in giug da mudesta qualitad ius a fin cun in remis.
FC Landquart-Herrschaft – US Schluein Glion 1:1 (0:0)
Ried, Landquart. – 88 aspectaturs. – AR: Lekaj
Gols: 57. Maurer 1:0, 86. BĂĽchler 1:1.
Landquart: Colombo; Roffler, Oertle, Martin; Weber, Maurer. Hashani, Aliji; Kolp, Petrovic (90. Caleta), Demarmels (68. Pirovino).
Schluein Glion: Hornacek; Berni (86. Wellinger), Bundi, Welter; Casanova (63. Büchler), Dermont, Ramon Derungs, Marino Cavegn, Coray (63. Tschalèr); Gabriel Derungs (82. Andreoli), Airaghi.
Remarcas: Schluein Glion senza Lars Caduff, Livio Derungs (blessai), Luca e Tiziano Vinzens (absents). – Cartas mellnas: 18. Weber (foul), 78. Dermont (foul), 78. Gabriel Derungs (reclamar). – Debut da Tizian Casanova e Gian Luca Coray tier Schluein Glion.