En in tipic giug dall’entschatta da primavera han las equipas da Valposchiavo Calcio e Schluein Glion repartiu meritadamein ils puncts. Als indigens che cumbattan per la relegaziun eis ei reussiu dad ir duas gadas en avantatg sin il pign e plitost maluliv plaz a Campascio, Gabriel Derungs ha denton duas gadas rispundiu cun bein plazzai culps libers ed aschia salvau in punct a Schluein Glion.
Il giug ha entschiet cun bunamein ina mesa ura retard, cunquei ch’igl arbitrader dalla Bassa ha duvrau empau pli gitg d’anflar la via sur ils pass ed atras vent e bischa giu en la vallada dil sid. L’equipa indigena, senza il liung viadi en las combas, ha entschiet en cumbattiv e cun slontsch e mussau ch’ella sto e vul recaltgar il puncts a casa sch’ella vul mitgar dalla relegaziun. Schluein Glion ha giugau ruasseivel ed empruau da dar siu giug cun cumbinaziuns ord la defensiun. Las empremas vegn minutas ha negina equipa giu grondas caschuns da marcar, aschia ch’il gol d’avantatg per Valposchiavo ei plitost curdaus surprendentamein. Romano Solèr ha astgau surprender ina balla ch’ei sgulada naven dalla vart seniastra sper plirs giugadurs vi atras la dasedisch e marcar da cuorta distanza igl emprem gol. Silsuenter ha Schluein Glion encuretg empau pli decisiv la via al gol e suenter 35 minutas ha Marino Cavegn saviu vegnir frenaus mo cun in foul cuort avon la zona da puniziun. Il culp liber ha Gabriel Derungs alzau cun tut sia rutina sur il mir en exact el cantun ed aschia egalisau.
Suenter pausa ha il giug entchiet en mal per Schluein Glion. Valposchiavo ha retschiert in culp liber dalla vart seniastra, il qual ei vegnius sittaus da pulita distanza ault vi avon gol, nua ch’il defensur Davide Gusmeroli ha saviu marcar cul tgau il 2:1. Suenter quella frida ha Schluein Glion surpriu pli e pli il domini dil giug e sfurzau ils indigens en lur mesadad. Lezs stevan denton compact, cumbattevan cun tuttas forzas ed empruavan da vegnir al success cun spertas cunterattaccas. En la 68avla minuta ha Marino Cavegn puspei saviu vegnir frenaus mo cun in foul, aschia che Gabriel Derungs ha puspei astgau sittar in culp liber da cuorta distanza. Cunquei che mir e goli han puspei spitgau che Derungs aulzi la balla sur il mir en, ha el elegiu in’autra varianta per marcar il gol. El ha sittau la balla bass sper il mir vi ed il davos um da Valposchiavo ha stuiu schar mitschar quella en la reit.
Valposchiavo Calcio – US Schluein Glion 2:2 (1:1)
Casai, Campascio. – 55 aspectaturs. – AR: Büsch
Gols: 23. Romano Solèr 1:0, 35. Gabriel Derungs 1:1, 48. Davide Gusmeroli 2:1, 70. Gabriel Derungs 2:2.
Valposchiavo: Tuena; Manuele Solèr, Gusmeroli, Cristiano; Menghini (70. Phatphuang), Rampa, Moreno Cortesi, Oscar Cortesi, Romano Solèr; Phatphuang (60. Lardi), Acquistapace (75. Raselli).
Schluein Glion: Marco Cavegn; Berni, Bundi, Welter; Dermont, Ramon Derungs, Marino Cavegn (72. BĂĽchler), Luca Vinzens, Tiziano Vinzens (25. Caduff); Gabriel Derungs, Airaghi.
Remarcas: Schluein Glion senza Andreoli e Livio Derungs (blessai). – Cartas mellnas: 61. Rampa, 64. Airaghi, 66. Cristiano (tuts pervia fouls). – Debut da Raffaele Airaghi ed Aron Büchler tier Schluein Glion.