Cun la siatavla victoria egl endischavel giug terminescha Schluein Glion la prerunda dil campiunadi sco giavischau denter ils emprems treis dalla tabella. Encunter Razén ha l’equipa sursilvana dominau naven dall’entschatta e schau negin dubi tgi che banduni il plaz sco victur.
Entochen ch’ils gols decisivs ein curdai han ils buns fans dall’USSI – era a Razén han ins dumbrau sper il plaz in pli grond diember d’adherents sursilvans che adherents dall’equipa indigena – stuiu spitgar in mument e haver pazienza. Schluein Glion ha duront l’entira emprema mesadad fatg il giug e schau cuorer igl adversari, avon il gol ha l’equipa da Cyrille Belinga denton agiu memia pauc decisiv e cunzun era memia pauc precis. Aschia eis ei reussiu a Razén da tener il resultad da 0:0 entochen tier la pausa.
Suenter il té ein las attaccas lu vegnidas empau pli decisivas e beingleiti han ils fans da Schluein Glion astgau applaudir igl emprem gol. Alla fin dad ina biala attacca sur la vart dretga ha Luca Vinzens surviu Marino Cavegn cun in pass en la gassa ed il giuven da mo sedisch onns ha pigliau il goli da Razén „conterpied“ e marcau il 0:1. Ussa ha l’equipa indigena stuiu agir empau pli offensiv, quei che ha immediat dau a Schluein Glion dapli plaz el giug offensiv, aschia che pliras bunas caschuns da marcar ein vegnidas creadas denton era munchentadas. En la 74avla minuta ei il secund gol lu tuttina curdaus. Quella gada han Gabriel Derungs e Tiziano Vinzens cumbinau bein e spert la balla sper ils defensurs da Razén ora ed alla fin ha Gabriel Derungs saviu marcar siu 10avel gol persunal. Mo ina minuta pli tard han ils indigens giu lur megliera caschun da sittar in gol. Miro Niederer ha denton alzau la balla persuls avon il gol en la latta traversa ed aschia munchentau da procurar per empau tensiun per la davosa part dil giug.
SC RazĂ©n – US Schluein Glion 0:2 (0:0)
Saulzas. – 75 aspectaturs. – AR: Lekaj
Gols: 55. Marino Cavegn 0:1, 74. Gabriel Derungs 0:2.
Razén: Jecklin; Hosang (67. Campos), Zanolari, Munoz, Oertli; Maraj (89. Sibilia), Dorn (60. Djermanovic), Noé Niederer, Tino (46. Miro Niederer); Stockmann (82. Agaei), Elmer.
Schluein Glion: Marco Cavegn; Berni (81. Sergio Welter), Livio Derungs, Silvan Welter; Nay (67. Dermont), Ramon Derungs, Marino Cavegn (82. Gomes Machado), Tiziano Vinzens, Luca Vinzens; Caduff (73. Tschalèr), Gabriel Derungs.
Remarcas: Schluein Glion senza Andreoli, Camenisch e Hornacek (reconvalescents), Bundi (blessaus) Möglich (absents). – Cartas mellnas: 41. Livio Derungs (foul), 43. Tino (foul), 58. Hosang (foul), Nay (reclamar), 81. Djermanovic (foul), 81. Berni (reclamar). – 75. siet en la traversa da Miro Niederer.