El davos giug a casa dalla prerunda ha Schluein Glion stuiu bandunar per l’emprema gada il plaz a Crap Gries sco sperdider. A l’equipa da Sargans eis ei gartegiau da batter la squadra sursilvana cun ina prestaziun disciplinada e cumbattiva.
Sco bunamein adina els giugs da quest atun, cura che l’equipa da Schluein Glion ei stada en acziun, eran aspectaturas ed aspectaturs aunc strusch seplacai sin tribuna ch’igl arbiter ha schon astgau nudar dus gols sin siu scret da giug. E sco era bunamein adina ha naturalmein buca l’equipa da Schluein Glion sittau igl emprem gol! Gia en la tiarza minuta ei la balla ida a piader el giug amiez e vegnida tier igl attaccader da Sargans, Jeff Grünenfelder, il qual ha en tutta ruasseivladad – mulestaus da negin soli – saviu menar la balla encunter il gol da Schluein Glion e realisar cun in bellezia siet da bien 20 meters, in aschi numnau „siet da dumengias“, il 0:1. Suenter quella scurlada ei l’equipa indigena lu denton era sedestadada e mo treis minutas pli tard ei igl 1:1 curdaus. Tiziano Vinzens ha menau la balla spert e cun fentas sper plirs defensurs vi en la zona da puniziun, nua che Lars Caduff ha surpriu ella e realisau cun saung freid siu novavel gol dalla stagiun.
Suenter quell’entschatta furibunda ei il giug secalmaus empau. Ils indigens empruavan da baghegiar si attaccas decisivas, senza denton saver crear pli grondas caschuns da marcar ni da far vegnir grond malruasseivla la ferma defensiun da Sargans. L’equipa songagliesa persuenter sperava da vegnir cun spertas cunterattaccas al success, quei ch’ei denton era gartegiau mo a mesas. Persuenter vegneva ei adina malsegir avon il gol da Schluein Glion, cura che Sargans saveva sittar in culp liber – per part era da gronda distanza – en la zona da puniziun. Pliras gadas ein ils gronds giugadurs songaglies vegni da menar la balla en direcziun dil gol cun culps cul tgau, percletg denton per Schluein Glion mo en direcziun dil gol e buca en gol.
E tuttina ha in da quels culps libers purtau Sargans en la 23avla minuta puspei en avantatg. Armando Mullis ha sittau la balla da bien trenta meters liung ed ault vi avon il gol da Schluein Glion, nua che Stephan Berni ha el disuorden da giugadurs menau ella disgraziadamein en la reit. Quei autogol ei lu surprendentamein era gest staus il gol decisiv dalla partida. Era sche Schluein Glion ha empruau el temps restont avon la pausa e cunzun duront l’entira secunda mesadad d’egalisar e forsa schizun ir en avantatg ei quei buca gartegiau. Encunter la ferma e consequenta defensiun da Sargans eis ei numnadamein buca stau sempel da crear biaras e bunas caschuns da marcar e quellas paucas ch’ein vegnidas creadas, ein vegnidas munchentadas malamein, aschia che negins gols ein curdai pli entochen la fin.
US Schluein Glion – FC Sargans 1:2 (1:2)
Crap Gries. – 175 aspectaturs. – AR: Kojadinovic
Gols: 3. GrĂĽnenfelder 0:1, 6. Caduff 1:1, 23. Berni 1:2 (autogol).
Schluein Glion: Marco Cavegn; Berni (46. Luca Vinzens), Möglich, Welter; Nay (34. Ramon Derungs), Dermont, Livio Derungs, Marino Cavegn, Tiziano Vinzens; Caduff (73. Tschalèr), Gabriel Derungs.
Sargans: Dosch; René Walser, Kalberer, Weber, Kreis; Mathis (67. Schai), Armando Mullis (86. Schumacher), Spillmann, Bigger; Marco Walser, Grünenfelder (77. Thavaratnam).
Remarcas: Schluein Glion senza Andreoli, Camenisch e Hornacek (reconvalescents), Bundi (blessaus). – Corners: 8:6.