Schluein Glion memia ferms per Walenstadt

Suenter ina pauc empermettenta entschatta ha Schluein Glion surpriu cun la fin dalla emprema mesa ura il domini dil giug e schau als indigens da Walenstadt neginas schanzas. Cun il resultad da 2:6 ein els schizun aunc vegni naven bein, Schluein Glion havess aunc saviu sittar dapli gols.

L’equipa da casa ha entschiet en il giug el ferm vent sil plaz sper il lag cun grond slontsch e procurau per empau respect e disuorden en la defensiun da Schluein Glion. Aschia eis ei era gartegiau a Walentstadt dad ir en avantatg gia en la otgavla minuta, quei suenter in corner cun in siet dad Agron Beqiri ch’ei aunc vegnius deviaus. Cun grond spért cumbattiv han ils indigens e suenter quei gol empruau da buca schar vegnir Schluein Glion el giug. Quei ei lu era gartegiau in mument stupent, cunquei che l’equipa sursilvana ha fatg bia sbagls enten baghegiar si il giug. Pli vegls ch’il giug vegneva e pli bein ch’il giug offensiv da Schluein Glion funcziunava, aschia eis ei stau pli u meins mo ina damonda dil temps entochen ch’ei gartegi da egalisar. En la 27avla minuta eis ei stau aschi lunsch: Lars Caduff ha reagau spert suenter ina malcapientscha en la defensiun indigena e marcau en duas emprovas igl 1:1. Ussa ha Schluein Glion surpriu il domini e sittau entochen pausa aunc in secund gol. Suenter in foul en la zona da puniziun vi da Tiziano Vinzens ha Gabriel Derungs buca giu breigias da realisar cun in ferm e plazzau siet naven dil punct da penalti.
Suenter pausa ha Schluein Glion entschiet en ferm e decidiu la partida enteifer las empremas vegn minutas. Quater gols entras Gabriel Derungs, Marino Cavegn, Tiziano Vinzens e Lars Caduff cun siu secund gol persunal han procurau per la differenza e priu als indigens tutta speronza da forsa saver recaltgar in punct.

FC Walenstadt – US Schluein Glion 2:6 (1:2)

Exi. – 66 aspectaturs.

Gols: 8. Beqiri 1:0, 27. Caduff 1:1, 36. Gabriel Derungs 1:2 (Penalti), 48. Gabriel Derungs 1:3, 51. Marino Cavegn 1:4, 59. Tiziano Vinzens 1:5, 67. Caduff 1:6, 85. Beqiri 2:6 (Penalti).

Walenstadt: Ademi; Sestito (61. Aliu), Gmür, Beqiri, Bühler; Murati, D’Agostino, Landauer, Gomes; Liccese (75. Mitrovic), Samac (55. Gubser).

Schluein Glion: Marco Cavegn; Berni, Möglich, Welter; Nay, Livio Derungs, Marino Cavegn (75. Dermont), Tiziano Vinzens (77. Gallmann); Luca Vinzens; Caduff (70. Tschalèr), Gabriel Derungs (82. Dakic).

Remarcas: Schluein Glion senza Andreoli, Camenisch e Hornacek (reconvalescents), Bundi blessaus Ramon Derungs (serraus). – Cartas mellnas: 33. Livio Derungs (foul), 37. Liccese (reclamar), 61. Gmür (foul), 75. Aliu (foul). – 72. gol da Gabriel Derungs vegn annullaus (ordgiug?)– Corners: 8:3.