Aspectaturas ed aspectaturs han viu a Crap Gries naven dall’entschatta entochen la 95avla minuta excact il medem giug: Schluein Glion che empruava da cumbinar e crear bialas acziuns offensivas ed aschia sittar gols ed ils hops da Flums che spitgavan en lur mesadad ed empruavan da vegnir cun spertas cunterattaccas al success.
Il giug ha entschiet cun pauca dinamica ed empau lungurus. Suenter ch’il davos um da Flums haveva menau in culp cul tgau da Gabriel Derungs en la traversa ei buc curiu la massa entochen bunamein ina mesa ura. Bein era Schluein Glion clar la ferma equipa sil plaz e dominava il giug, caschuns da marcar ein denton mo paucas vegnidas creadas, cunquei ch’il davos pass ei pil pli buca gartegiaus exact. Suenter 28 minutas eis ei lu finalmein gartegiau als indigens dad ir en avantatg. Ramon Derungs ha reagau suenter ina balla rebattida sco emprem e ha sittau igl 1:0. Mo ina minuta pli tard ha Luca Vinzens giu la gronda caschun da sittar il secund gol per Schluein Glion. Persuls avon il goli eis ei denton buca gartegiau ad el d’alzar il resultad. Persuenter ha Flums egalisau surprendentamein. Dominik Dort ei buca vegnius attaccaus consequentamein e ha nezegiau quei cun in ferm e plazzau siet da bien 20 meters el cantun bass.
Era suenter quella frida han ils indigens dominau vinavon il giug ed ein cuort avon pausa puspei i en avantatg. In defensur da Flums ha per in mument quintau ch’el seigi in goli e teniu la balla cul maun aschia ch’igl arbiter ha per consequenza schulau in penalti e mussau al giugadur la carta cotschna. Il penalti ha Gabriel Derungs plazzau ferm e segir el cantun bass.
Suenter pausa han aspectaturas ed aspectaturs viu il medem giug a Crap Gries sco naven dall’entschatta. Schluein Glion en l’attacca – ussa mo pli encunter 10 umens – e Flums en la defensiun, sperond da saver iniziar enzacu inagada ina cunterattacca decisiva. L’equipa indigena ha denton buca lubiu quei e sezza munchentau pliras bunas occasiuns da realisar, aschia ch’il secund gol persunal da Gabriel Derungs suenter in sbagl dil goli da Flums ha muntau il resultad final da 3:1.
US Schluein Glion – FC Flums 3:1 (2:1)
Crap Gries. – 175 aspectaturs. – AR: Niederberger
Gols: 28. Ramon Derungs 1:0, 32. Dominik Dort 1:1, 45. Gabriel Derungs 2:1 (penalti), 76. Gabriel Derungs 3:1.
Schluein Glion: Marco Cavegn; Berni, Möglich, Welter; Bundi, Nay (78. Dermont), Ramon Derungs (58. Livio Derungs), Marino Cavegn (75.Tschalèr ), Tiziano Vinzens (83. Gallmann); Luca Vinzens (58. Caduff), Gabriel Derungs (84. Dakic).
Flums: Heidegger; Kurath (65. Haliti), Mullis, Marcel Dort, Schaffhauser (21. Rico Nadig); Andreaas Nadig, Dominik Dort, Mollet, Hermann; Sanchez (Ramadani), Walser (46. Sadiki).
Remarcas: Schluein Glion senza Andreoli, Camenisch e Hornacek (reconvalescents), Flums senza Zeller (serraus). – Cartas mellnas: 45. Walser, 52. Ramon Derungs, 64. Rico Nadig (tuts per fouls). – Carta cotschna: 45. Hermann (maun). – 6. Heidegger meina in siet cul tgau da Gabriel Derungs en la traversa. – Corners: 7:7.