Schluein Glion ha mussau el giug encunter l’equipa da Bogn Ragaz ina buna reacziun sin l’emprema terrada dalla davosa jamna. El giug dallas duas equipas ch’ein vegnidas relegadas la davosa sesiun dalla secunda ligia ha ei dau ina clara victoria da 4:0 per l’equipa sursilvana. Tuts ils quater gols ha Gabriel Derungs sittau.
Suenter dus remis ed ina terrada ei l’equipa da Schluein Glion puspei turnada al victorisar. Quei era sche Bogn Ragaz ha entschiet il giug cun grond slontsch ed ha cun in giug agressiv giu empau dapli dil giug duront las empremas minutas. L’equipa indigena ha buca schau stermentar da quei e ha pli e pli surpiu il domini dil giug. Cuort avon la fin dalla emprema mes’ura ei lu era igl emprem gol curdaus per Schluein Glion. Tiziano Vinzens ha saviu vegnir frenaus en la zona da puniziun mo cun in foul e Gabriel Derungs ha buca giu breigias da tuccar la noda naven dil punct da penalti. Diesch minutas pli tard ha Gabriel Derungs lu sittau la balla per la secunda gada en la reit. Suenter in solo dalla vart dretga ha Lars Caduff dau ina biala flanca ed il caposettagols dils davos onns ha era nezegiau quella caschun.
Suenter pausa ha Schluein Glion immediat dominau il giug ed encuretg la decisiun definitiva. Quella ei lu era curdada enteifer mo tschun minutas e puspei entras Gabriel Derungs. Igl emprem ha el menau cun bia acrobatica e cun sestender tut mo il pusseivel ina flanca da Luca Vinzens da gol en e silsuenter eis el vegnius survius da Tiziano Vinzens e Linus Tschalèr ed ha sittau siu quart gol persunal. Schluein Glion ha aschia recaltgau meritadamein sia tiarza victoria ed astga serender cun in bien sentiment il vendergis proxim en Glaruna per dar il giug encunter il capogruppa, la secunda equipa da Linth 04.
US Schluein Glion – FC Bogn Ragaz 4:3 (2:0)
Crap Gries. – 205 aspectaturs. – AR: Cadusch
Gols: 28. penalti/38./65. + 70. Gabriel Derungs 4:0.
Schluein Glion: Marco Cavegn; Berni, Möglich, Welter; Ramon Derungs, Dermont (66. Livio Derungs), Marino Cavegn (84. Nay), Tiziano Vinzens (78. Gallmann), Luca Vinzens; Caduff (68. Tschalèr), Gabriel Derungs (86. Dakic).
Bogn Ragaz: Ambühl; Bergamin (31. Reutimann), Michael Caluori, Sandro Kressig, Gerber (62. Marc Kressig); Orlando Caluori (56. Schneider), Rudigier (38. Kohler), Näf, Rauti (73. Schlegel); Mühelbach, Bigger.
Remarcas: Schluein Glion senza Andreoli, Camenisch e Hornacek (reconvalescents). – Cartas mellnas: 9. Bergamin, 32. Berni, 60. Dermont, 73. Rauti, 75. Tschalèr (tuts per fouls). – Corners: 5:9.