Buca mo il tschiel ha aviert il gliendisgis sera sias portas e schau plover ualti intensiv a Glaruna, na era las duas equipas han giugau en quei giug ch’era vegnius stuschaus avon duas jamnas pervia dalla malaura cun portas aviartas. Aschia ei la partida ida a fin sin in plaz fetg grev e maluliv cun in pari da 4:4.
Schluein Glion ha entschiet miserabel il giug. L’equipa sursilvana ha giu naven dall’entschatta breigia cun las relaziuns e cun igl adversari agressiv ed aschia schau sittar ils indigens gia en las empremas 12 minutas dus gols. Suenter quell’entschatta pauc captivonta ha l’equipa da Cyrille Belinga denton encurschiu che cumbinaziuns per tiara eran buca aschi semplas sin in plaz plein scavs. Ella ha medemamein entschiet a purtar la balla spert e direct avon il gol dils indigens ed aschia egalisau il resultad entochen la 24avla minuta. Duas gadas ei il giuven Lars Caduff vegnius lantschaus cun pass precis e duas gadas ha el nezegiau la caschun e sittau ses gols tschun e sis en quella sesiun. Silsuenter ei il giug sequietaus empau. Tochen pausa han bein omisduas equipas aunc giu enqual occasiuns da sittar in gol, mo neginas da quellas ein vegnidas nezegiadas.
La secunda mesadad ha entschiet sco l’emprema. Suenter quater minutas han ils indigens nezegiau in culp liber per puspei ir en avantatg. Quella gada ha Schluein Glion denton reagau immediat e sittau cun la proxima attacca il 3:3. Marino Cavegn ei vegnius lantschaus bein en la profunditad e ha schau al goli indigen negina schanza cun in siet el cantun bass. Ussa ha Schluein Glion surpriu pli e pli il domini dil giug. Ils indigens han mo pli speculau da vegnir cun ina cunterattacca al success ni cun in culp liber. E quei ei era gartegiau cuort avon la fin. Igl arbiter ha schulau in foul per Netstal e la balla ei vegnida sittada da pulit gronda distanza en la da sedisch da Schluein Glion, nua che tut ils defensurs han durmiu e schau sittar Marco Cucinelli siu secund gol persunal. Spiarder quei giug han ils giugadurs da Schluein Glion lu tuttina buca vuliu e perquei aunc inagada fatg tut ils sforzs per egalisar. Quei ei ina minuta avon la fin lu era reussiu, quella gada ha in culp liber per Schluein Glion purtau il success. Tiziano Vinzens ha diregiu la balla sil tgau da Stephan Berni che ei siglius il pli ad ault e ha diregiu tala en la reit.
FC Netstal – US Schluein Glion 4:4 (2:2)
Plazza sportiva Wiggis – 75 aspectaturs – SR: Tahiri.
Gols: 2. Contardi 1:0, 12. Toprakkale 2:0, 16. Caduff 2:1, 24. Caduff 2:2, 49. Cucinelli 3:2, 50. Marino Cavegn 3:3, 87. Cucinelli 4:3, 89. Berni 4:4.
Netstal: Caetano; Pfeiffer, Zweifel, Mühlethaler, Leuzinger; Contardi, Lopes, Sauter, Reumer; Toprakkale, Cucinelli (midau en: Jashari, Elber, Kormann, Gössi).
Schluein Glion: Marco Cavegn; Möglich, Nay, Gallmann; Bundi, Ramon Derungs, Tiziano Vinzens, Marino Cavegn, Tschalèr (65. Berni); Gabriel Derungs, Caduff (81. Dermont).
Remarcas: Cartas mellnas: 34. Ramon Derungs, 44. Leuzinger, 52. Contardi, 72. Marino Cavegn, 85. Zweifel (tuts pervia da fouls).