Buna entschatta per Schluein Glion

Encunter ina equipa da Valposchiavo, che ha giugau cunzun en l’emprema mesadad senza gronda agressivitad, ha Schluein Glion gudignau igl emprem giug da campiunadi senza difficultads e meritadamein. Dus gols dils dus pli giuvens giugadurs avon pausa e treis gols cuort suenter la pausa han decidiu in giug gia avon ch’in ura era vargada.

L’equipa da Schluein Glion ha entschiet en il giug concentrau ed ei daventada naven dalla 10avla minuta adina pli dominonta encunter in Valposchiavo che ha giu tuttas breigias d’insumma crear acziuns offensivas. Igl ei stau mo ina damonda dil temps cura che igl emprem gol crodi per Schluein Glion. Suenter 18 minutas eis ei stau aschi lunsch. Marino Cavegn ha battiu il davos um da Poschiavo cun in siet da distanza el cantun bass. Mo empau pli tard ha era il secund debutant en l’equipa indigena, Lars Caduff, muossau ch’el sappi nua ch’il gol stat. Suenter ina biala roschada da pass ha el survegniu la balla all’entschatta dalla zona da puniziun ed ha schau cun in siet plazzau el cantun bass neginas schanzas al goli. Entochen pausa ha Schluein Glion aunc giu entginas pusseivladads da marcar in tierz gol, quellas ein denton tuttas vegnidas munchentadas.

Suenter pausa han ils indigens lu priu pli serius il sittar gols ed aschia tuccau enteifer mo quater minutas treis gadas en la reit ed aschia decidiu il giug; per la secunda gada Lars Caduff, Serafin Bundi e Stephan Berni ein stai ils giugadurs cun buna mira. Suenter igl emprem gol da Valposchiavo cun in culp liber direct ha lu Luzi Dermont alzau il resultad cun in plazzau siet en la ruosna denter il goli e la petga sin 6:1. Silsuenter ha Schluein Glion priu il giug empau pli luc e lubiu als hosps enqual acziun en l’offensiva, aschia ch’els ein cuort avon la fin aunc vegni da migliurar il resultad cun sittar dus gols.

US Schluein Glion – Valposchiavo Calcio 6:3 (2:0)

Crap Gries. – 195 aspectaturs. – AR: Baumgartner

Gols: 18. Cavegn 1:0, 28. Caduff 2:0, 50. Caduff 3:0, 52. Bundi 4:0, 54. Berni 5:0, 58. Raselli 5:1, 68. Dermont 6:1, 87. Corti 6:2, 90.+1. Acquistapace 6:3.

Schluein Glion: Capaul; Livio Derungs, Nay, Welter; Bundi (83. Möglich), Cavegn, Gallmann, Berni (67. Vinzens), Andreoli (62. Dermont); Caduff (74. Coray), Gabriel Derungs (74. Tschalèr).

Valposchiavo: Macsenti; Solèr (62. Kalt), Cristiano, Gusmeroli, Sophanna; Cortesi (74. Misani), Nakarin Phatphuang (78. Acquistapace), Raselli (67. Menghini), Warawoot Phatphuang; Lardi, Acquistapace (46. Corti).

Remarcas: Schluein Glion senza Albin e Hornacek (blessai), Ramon Derungs (vacanzas), Tiziano Vinzens (absents).